Svar til Kirsten Mc Clellan Steine

Å itte veit je, men jammen trur jeg, song Erik Bye. Sannsynsgraden i trua kan vera variabel.

Når det gjeld Hardangerbadet og Kvammabadet, har det vore både tru og mistru. Og mange påstandar er sette fram. Men i tillegg til å ta til seg fakta er det òg viktig å sjå på alternativa. Å opprusta bassenga var nok ikkje eit alternativ. Det har andre prøvd med lite hell kostnadsmessig.

Hadde ikkje Hardangerbadet vorte realisert, hadde nok det vedtekne 25-metersbassenget i Norheimsund vorte bygd. Det grunngjev eg med to vedtak i heradsstyret, og at fleire parti hadde det høgt prioritert i valprogramma sine for 2011–2015 (ref. mitt innlegg i HF 29.11.24), og i tillegg hadde Bygdelista for Norheimsund basseng i Norheimsund som einaste sak i partiprogrammet sitt. Då er det sjølvsagt naturleg at ein del vert skuffa over dette. Eg tvilar på at det trengst nokon vidare dokumentasjon.

Steine hevdar eg skuldar koronapandemien for å vera årsaka til for låge besøkstal! Ja, koronaen førte til svikt i turisttrafikken som betydde tapte besøk, men dårlegare økonomi og dyrtid har òg lagt ein dempar på besøka. Negativiteten som stadig kjem fram, er også øydeleggjande for besøkstala. Her vert ulike påstandar sette fram. Oppblåsne prognosar på besøkstal er ein, men her rettar ein bakar for smed.

Besøkstala er stipulerte av eksterne firma med bakgrunn i erfaringar frå andre liknande prosjekt. Der ulike faktorar vert vurderte mot einannan. I innlegget ditt i HF tysdag 3. desember unngår du å nemna at rådmann Arild McClellan Steine vurderte besøkstal frå 70.000 til 100.000, og han konkluderte med at 85.000 ville vera eit normalår med gradvis auke (Kvam herad, arkivsak 14/293).

Årsaka til utfordringane er for låge besøkstal. Og dei er samansette.

Kritiske spørsmål er heilt ok. Men ikkje slike utsegner som J. Rønhovde kjem med i HF: «(...) berre ting vert i Øystese, så har kostnad ingenting å seia så lenge det offentlege subsidierer.» At idrettsanlegg får tippemidlar og momskompensasjon o.s.v., er vanleg. I dette tilfellet er det det kommunale anlegget Kvammabadet som har nytt godt av dette (ref. arkivsak Kvam herad 16/157-80, side 16). Når det gjeld fordelinga av tippemidlar, er det heradsstyret som vedtek prioriteringsrekkjefylgja. Kva andre prosjekt i Øystese han siktar til, veit berre han. Men det burde han ha nemnt!

At Martin Vik uttalte at tilskotet frå Kvam herad var for lågt, er ikkje unaturleg (HF 10.07.2020). For det var det. Når Hardangerbadet får kr 900.000 for å drifta Kvammabadet, og det i etterkant vert trekt kr 500.000 til å dekka drift av og styrehonorar i det kommunale Kvammabadet, er det ikkje mykje att til å drifta skulebading med. Det burde kanskje andre ha sett òg!

At nokon framsnakkar sakene sine, er vel også ganske vanleg. Det kallast visst lobbyisme. På rådhuset i Kvam trur eg det har føregått lenge før denne saka. Både for og imot saker. At krefter jobba intenst mot Hardangerbadet, er òg velkjent. På mange vis og på ulike arenaer. Eg er usikker på kor godt mjølet deira er eigna til julebaksten.

Det var mange ting som skulle falla på plass for at prosjektet Hardangerbadet skulle lukkast! Og svært mykje fall på plass.

Heile prosjektet var prisgarantert av LAB. Kvammabadet kom på 101 millionar kroner totalt. Kvam herad fekk det for 24,5 millionar kroner. Årlege driftskostnadar er framleis mindre enn om ein skulle bygd nytt 25-metersanlegg. Ref. Norconsult si utgreiing av 25-metersbasseng Gratangen i 2017. Total kostnad 6,1 millionar kroner (avdrag og drift) Indeksregulert 2024 vert det 7,9 millionar.

At Steine forlanger anger, audmjukskap og orsaking i denne saka, tykkjer eg er spesielt.

Kva då med 100-millionarssprekken på barneskulen, og at Kvam vidaregåande skule vart for Kvam sin del budsjettert til 46 millionar kroner, og vil koma på over 120 millionar kroner? Kven skal stå til rette her?

Helse i Hardanger har levert langt over det nokon kunne drøyma om. At dei ikkje fekk avtale med Helse Bergen, var synd. Når døgnprisen i eit anbod tel meir enn totalprisen, og at dei her kan behandla 3 pasientar mot 1 på tradisjonell rehabilitering, då vert det heile litt underleg. Særleg når me veit kva helsebudsjettet i Noreg ligg på. Så vil tida vise om nokon vil prioritera at folk vert friske!

Steine har gode tankar og betraktningar om prosessar og diskusjonar, men eg er ikkje heilt einig i konklusjonane. Det er også mange i Øystese som vegrar seg for å ytra seg i saker som gjeld bygdene! Også i denne saka.

Å sjå felles fotball, næringssamarbeid og at kjøpmennene annonserer i felles blad o.s.v., er flott. Samarbeidet mellom bygdene våre vert stadig sterkare. Og det er viktig.

At fornufta sigrar over lysta til bygdestrid, meiner eg saka om den nye vidaregåande skulen i Kvam er eit eksempel på. Mange i Øystese føler eit vemod over at tradisjonsrike og velrenommerte Øystese gymnas vert flytta til Norheimsund. Vedtaket skjedde fort, utan lokale politiske vedtak. Men at lokale krefter har vore i sving, er heilt klart. Skulle ein vore konspiratorisk, kunne ein sjølvsagt meint at «sentrumsinteressene» i Norheimsund ville mjøla si eiga kake med ureint mjøl! Men den hadde ikkje smakt godt, så eg vel å tru at det var for Kvam sitt beste og ungdommen vår det vart gjort. Og det trur eg dei fleste meiner!

Å itte trur je, men jammen veit jeg!

Det er usikre tider i verda. Men me har mykje å gleda oss over i Kvam! Det er ein god plass å leva både for unge og gamle. Me treng at folk får lyst å flytta til Kvam, då må me visa kor mange kvalitetar me verkeleg har her! Og dei er mange. Hardangerbadet er ein slik kvalitet som mange i alle bygder er glad i!

Det er lett verta påverka av følelsar. Då er det viktig å vita kva følelsar me matar.

God førjulstid!