Svar på Kvam Frp sitt innlegg under fritt ord i HF 20. desember som svar på kronikk 17. desember

Arne Tillung

Administrerande direktør Kvam Kraftverk

Styremedlem i Samfunnsbedriftene Energi og IKT

Som det heilt rett vert påpeika, er vindkraft ikkje nemnt som eit satsingsområde i selskapet sin strategiplan. Eg kan betrygga Kvam Frp og andre lesarar med at dette heller ikkje er noko selskapet og administrasjonen arbeider med.

Kronikken er skriven og send inn av vår arbeids- og interesseorganisasjon Samfunnsbedriftene Energi og IKT, der eg har verv som styremedlem. Kronikken representerer vårt syn på vindkraft i forhold til gjennomføringa av det grøne skiftet. Vindkraft er eit vanskeleg tema som har ført til store konfliktar fleire stadar. Likevel meiner eg at me må kunne diskutere dette som eitt av fleire alternativ for å kunne oppnå dei politiske måla om meir fornybar kraft og elektrifisering av samfunnet.

Det vert i innlegget vist til at me i Kvam kunne bidrege med meir fornybar kraft i form av utbygging av for eksempel Fosselva. Til dette er eg heilt einig, men utbygging av vasskraftverk i verna vassdrag er ikkje ei enkel sak og om mogeleg enno meir konfliktfylt enn utbygging av vindkraft.

Heilt sidan 1950- talet har det vorte diskutert kraftutbygging i dette vassdraget, og det har vore gjort fleire utgreiingar. I 2014 gjorde me ein større moglegheitsstudie for ei skånsam kraftutbygging i Fosselva etter moderne prinsipp. Det vart også føreteke ei førebels konsekvensutgreiing. Resultata vart lagde fram for eigar. Studien viste at det er fullt mogeleg å få til ei utbygging av vasskraft i Fosselva utan at vassføringa i Steinsdalsfossen vert berørt, og utan at det vert bygd eit tradisjonelt reguleringsmagasin. Det tekniske og økonomiske potensialet er til stades, men ein vil måtte ha brei lokal støtte og draghjelp frå eigar og politisk hald for å kunne arbeida vidare med dette. Fosselva med tilsigsområde vart verna i 1986 gjennom verneplan III. Ei utbygging av vasskraft i Fosselva vil difor måtte opp til handsaming og godkjenning av Stortinget.