Rassikring av alle hovudvegar no!

Ullensvang Høgre v/leiar Anne Lise Naasen

Resolusjonsforslag frå Ullensvang Høgre til fylkesårsmøtet i Vestland Høgre 2025:

Tre gonger i 2024 har regionsenteret Odda i Ullensvang kommune vore fullstendig isolert fordi alle vegar har vore stengde på grunn av ras eller fare for ras.

Konsekvensane for innbyggjarane og næringslivet er enorme. Dette fører til at samfunnet vert totalt isolert. Liv og helse kan bli truga, folk kjem seg ikkje på arbeid, næringslivet får ikkje utført den transporten dei treng, og varer kjem ikkje fram. Sjølv om vegane er opne, er det mange foreldre som er redde for å sende barna sine til skulen på utrygge vegar. Slik kan vi ikkje ha det.

Vestland Høgre meiner at det er på høg tid at hovudvegar, både i Hardanger og andre stader, blir rassikra.

Heile riksveg 13 må sikrast mot ras! Fylkesvegen mellom Jondal og Folgefonntunnelen er stadig stengd på grunn av ras eller fare for ras. Her hastar det å kome i gang med tunnelarbeidet mellom Austrepollen og Nordrepollen. Det rasutsette Tokagjelet i Kvam herad må snarast sikrast med ny tunnel.

Situasjonen er utfordrande, og det er et sterkt behov for ein rassikker veg frå europaveg 134 til Bergen. Det er over 45 punkt med høg rasfare mellom E 134 og Bergen.

Vestland Høgre må arbeida for meir statleg finansiering til rassikring som éin konsekvens av den framtidige aust–vest- hovudvegen E134, med arm til Bergen.

Store verksemder i regionen har investert titals milliardar kroner dei siste åra. Regionen har ein verdiskapingsfaktor som er i landstoppen. Hardanger er også vertskap for ein stor straum av turistar i store delar av året. Ein velfungerande infrastruktur med sikre vegar er det minste vi kan forventa av regjeringa og Stortinget.