Peter Nejtek og logikken

I HF 04. februar fortel Nejtek om sitt syn på logikk. Utgangspunktet hans er nokre liner med kritikk av Israel i HF 14.01, i slutten av innlegget «Daudprat». Han meiner at sidan eg ikkje nemner noko om Hamas her, så frikjenner eg dei frå det som til no har skjedd på Gaza-stripa. Hans form for logikk her står til klar stryk.Lat oss ta dette steg for steg:

Hamas står ansvarleg for terrorangrepet mot sivile i Israel 07. 10. 23.

Dersom Nejtek hadde fylgt betre med i HF, hadde han oppdaga at eg i avisa 14. 11. 23 tek eit klart standpunkt der eg seier: «Nedslakting av sivile som Hamas stod for 7. oktober, var ei klar terrorhandling, ingen tvil om det.

Overlagt drap på sivile er terror, utan omsyn til om terroristen er vår ven eller fiende.»

Den uhyrlege nedslaktinga som så har skjedd på Gaza-stripa fram til i dag, står Israel og denne staten sine støttespelarar åleine ansvarlege for, og dei får stempelet terroristar til liks med Hamas – då terror vert definert som overlagt drap på sivile.

Så finn Nejtek ut at eg også i innlegget «Gazas tårer» frikjenner Hamas – på grunn av at eg ikkje nemner Hamas sine forutgåande aksjonar som altså førte til Israels reaksjonar i 2008/2009.

Dette er ikkje ei korrekt og fullstendig forklaring på situasjonen.

Det var oppretta våpenkvile mellom partane denne sommaren og hausten, men i november bomba Israel husa til to framståande Hamas-leiarar og likviderte seks personar. Etter ei tid reagerte Hamas med rakettar mot Israel, og så fylgde massakren.

Og Hamas fekk sjølvsagt all skuld.

Nejtek «gløymer» altså å nemna at det var Israel som braut våpenkvila og fekk det heile i gang – og med det frikjenner han Israel sin medverknad i eskaleringa.

Eg har aldri vore nøytral i denne fastlåste situasjonen i Palestina. Eg har teke eit val, og heldigvis har eg hamna på rett side i solidaritet med det undertrykte og fillerista palestinske folk.

Peter Nejtek er heller ikkje nøytral. Han har òg teke eit val, eit val der han – etter inntrykka eg har fått – står skulder ved skulder med okkupantstaten, apartheidstaten, terrorstaten og krigsforbrytarstaten Israel.

Peter Nejtek har no for andre gong sagt at han ikkje ynskjer ei ordveksling med meg. Heilt flott! Eg ser med glede fram til at han vil halda lovnaden sin.