NorthConnect-saka og Arbeidarpartiet

Torsdag 23. april skal Stortinget ta stilling til søknaden om å byggje ein gigantisk utanlandskabel frå Sima kraftverk i Hardanger til Skottland. Det er NorthConnect, ei samanslåing av tre norske og eitt svensk kraftselskap, som søkjer om konsesjon. 

Olje- og energiminister Tina Bru (H) og regjeringa går inn for å utsetje saka i fleire år, til dei utanlandskablane som er under bygging til Tyskland og England, er sette i drift. Denne saka har skapt eit sterkt engasjement. I høyringsrunden fram til 10. mars gjekk store delar av fagrørsla i LO, industrikommunar og miljøorganisasjonar sterkt imot å gje NorthConnect konsesjon.

Nok ein utanlandskabel vil bety enno meir krafteksport, import av høgare kraftprisar og auka press på kraftutbygging (inkludert vindkraft) i sårbar natur. Nok ein utanlands kabel vil svekke storsatsinga på å vidareutvikle miljøvenleg norsk industri basert på rein og rimeleg norsk kraft.

I Vestland fylkeskommune gjekk alle partia bortsett frå regjeringspartia H, V og KrF, samt MDG, imot å gje konsesjon. På Stortinget låg det lenge an til at eit stortingsfleirtal (d.v.s. Arbeidarpartiet, Senterpartiet, SV, Raudt og Frp) ville røyste imot konsesjon og dermed skrinleggje NorthConnect sitt prosjekt for å få opp kraftprisane i Norge. Saka tok ei ny vending 31. mars, då innstillinga frå energi- og miljøkomiteen kom. Arbeidarpartiet sin fraksjon med saksordførar Espen Barth Eide i spissen ville då ikkje lenger vere med på å stoppe dette kabelprosjektet frå Hardanger. Arbeidarpartiet gjekk i komiteen saman med regjeringspartia og MDG imot å seie nei, på vilkår av at Statnett skal få monopol til å byggje fleire utanlandskablar i framtida.

For dei som jobbar i den kraftforedlande industrien og industrisamfunna som er baserte på rimeleg, rein, norsk vasskraft, er dette mager trøyst frå Arbeidarpartiet. For dei er det hipp som happ om det er NorthConnect, Statnett eller andre som skal byggje denne kabelen. Dei vil ha den skrinlagd uansett kven som skal eige og drifte han, og dei vil ha prosjektet skrinlagt no! Difor er det mange her vest som no lurer på kva Arbeidarpartiet sine stortingsrepresentantar frå Hordaland (Magne Rommetveit, Jette F. Christensen, Eigil Knutsen og Ruth Grung) og frå Sogn og Fjordane (Ingrid Heggøy) vil gjere når denne saka skal avgjerast torsdag 21. april. Vil dei fylgje råda frå LO i Vestland og Vestland fylke om å seie nei til konsesjon – eller vil dei nok ein gong sikre fleirtal saman med regjeringspartia og MDG, slik dei gjorde i ACER-saka for vel to år sidan?