Nei til EU sin 4. energimarknadspakke!

Terje Kollbotn, gruppeleiar Raudt Ullensvang

Interpellasjon til Ullensvang kommunestyre 5. februar 2025:

Noreg har gjennom mange år tilpassa seg meir og meir EU sin indre energimarknad gjennom EØS-avtalen. Dette har m.a. skjedd gjennom norsk tilslutning til EU sine energimarknadspakkar nr. 1, 2 og 3 og tilknyting til EU sitt energibyrå ACER i 2018. Kvar gong desse EU-direktiva har vore handsama i Stortinget, har det blitt hevda at dette vil få liten innverknad på norsk kraftpolitikk. Det motsette har i ettertid vist seg å vere tilfellet, med auka press på norsk krafteksport gjennom fleire utanlandskablar, høgare og meir ustabile kraftprisar basert på ein internasjonal kraftbørs, og storstilt tilpassing av norsk kraftproduksjon til ein dysfunksjonell europeisk energimarknad.

No pressar EU på for at Stortinget også må godkjenne EU sin 4. energimarknadspakke så snart som råd. Energiminister Terje Aasland har no teke initiativ til at dette bør skje, i første omgang gjennom tre av EU-direktiva i energimarknadspakke 4.

Spørsmål til ordføraren:

1. Er ordføraren bekymra for den stadig sterkare norske tilpassinga til EU sin indre energimarknad og konsekvensane av denne utviklinga?

2. Korleis meiner ordføraren at kraft- og industrikommunen Ullensvang bør stille seg til ytterlegare norsk tilpassing til EU sin indre energimarknad og EU sin 4. energimarknadspakke?

Framlegg til vedtak:

1. Ullensvang kommunestyre ber regjering og Storting seie nei til EU sin 4. energimarknadspakke og ytterlegare norsk tilpassing til EU sin indre energimarknad.

2. Ullensvang kommunestyre ber regjeringa og Stortinget utvikle ein nasjonal kraftpolitikk som varetek interessene til innbyggjarane, norsk industri og næringslivet elles, framfor å godta stadig nye EU-direktiv i energisektoren. Å sikre rimelege og stabile kraftprisar i Noreg og streng regulering av krafteksport må blir prioritert. Konsesjonsvilkår og heimfallsrett som gjennom gode politiske prosessar varetek norske lokalsamfunn, naturomsyn, norsk industri og næringsliv må bli sikra.

3. Ullensvang kommunestyre ber regjeringa og Stortinget trappe opp støttetiltak til energieffektivisering i bustader, offentlege bygg og innan industri og større satsing på fjernvarmeanlegg i staden for rein elektrisk oppvarming i Noreg. Norge treng ikkje å vedta nye EU-direktiv for å kunne gjennomføre slike tiltak i Noreg.