Menneskerettane må gjelde for alle, også dei funksjonshindra

Suzanne Rødseth, Miljøpartiet De Grønne sin 3.-kandidat til stortingsvalet

Odd Valland Bovim, heradsstyremedlem og representant i rådet for menneske med nedsett funksjonsevne i Kvam herad

Samfunnet treng at fleire bidreg, då må ein slutte å hindre oss i å delta. Vi vil ha rett til å leve, bidra og delta i lokalmiljøet. For alle menneske er likeverdige uavhengig av kroppen sin og hjernen sin. Diverre vil regjeringa ha endå meir tid til å vurdere om desse prinsippa skal inn i menneskerettslova. 

Menneskerettane handlar om retten til å leve eit ekte og fullverdig liv. Vi med funksjonshindringar vart utsette for grove menneskerettsbrot over så lang tid at det vart laga ein eigen konvensjon – konvensjonen til rettane til personar med nedsett funksjonsevne (CRPD). Han handlar mest av alt om likestilling! 

Kvinner kjempa lenge for retten til sjølvstendige liv og full deltaking i samfunnet. No er det vår tur til å stifte familie, bli politisk aktive og starte eigne bedrifter. I 2009 vart kvinnekonvensjonen teken inn i menneskerettslova, no er det dei funksjonshindra sin tur. 

Nyleg hadde Dagsrevyen ei sak med overskrifta «Bjarni og 9000 andre kostar samfunnet 35 milliardar». Bjarni får assistanse for å kunne vere i arbeid. Det er tydeleg for meg at kommunane setjast i ein håplaus økonomisk skvis når prisaukane ikkje blir dekte av staten. 

Samstundes fryktar vi i MDG at menneskesynet bevegar seg i feil retning. Så eg, som funksjonshindra, må spørje direkte: Kva betyr det eigentleg å seie at «folk som Bjarni» kostar oss veldig mykje pengar? At han ikkje skal få leve eit fullverdig liv? 

Vi lever i eit skjebnefellesskap, i Noreg og i verda. Vi er tryggare og friare enn folk flest på jorda – alle som kjenner historia, veit at vi aldri må ta det for gitt. På fredsprisutdelinga i fjor vart det sagt at det er heilt avgjerande å velje «menneskelegheita vår» framfor dehumanisering og øydelegging. Vel menneskelegheita di og støtt likestillinga vår!