Kvifor kjøpte eg aksjar i Hardangerbadet?

Geirmund Skeie

For ein god del år sidan kom Martin Vik opp med ein i utgangspunktet luftig ide om å få til eit badeland i Øystese. Utruleg nok klarte han å få med større bedrifter på ein plan for å få til dette og samtidig berga vidare drift for det nedleggingstrua Hardangerfjord Hotel.

Sidan eg ikkje har hatt bustad i Kvam siste 40 åra og meir, har eg sett det meste frå utsida og kjenner ikkje så mykje til detaljar i det som skjedde for å få realisert prosjektet. Det meste av kunnskapen kom faktisk gjennom Hordaland Folkeblad. Det vart gjort ein del kreative grep for å få finansiert anlegget. Eg trur nok at dei fleste bedriftseigarar og privatpersonar som gjekk inn som aksjeeigarar, hadde same tanke som meg, at øystesebygda ville vera ei betre bygd med Hardangerbadet og Hardangerfjord Hotel enn utan desse. Dette var ein tanke som hadde temmeleg lite gjennomslag utanfor postnummer 5610, og tonen i avisa var for det meste negativ. Dette var nok i hovudsak grunnen til at eg ville yta min skjerv til tiltaket.

For tida har delar av grunnlaget for økonomien i anlegget svikta, og etter det eg forstår må nye midlar inn frå eigarar eller kommunen, eller ein kan velja konkurs sjølv om det siste er lite aktuelt.

Eg kjenner som aksjeeigar i Hardangerbadet eigedom på ein aldri så liten grunn til å be om orsaking for å skapa hovudbry for dei med ansvar for den kommunale økonomien i Kvam, men kjenner ikkje på det same for innbyggjarane i sentrale delar av heradet, då eg ikkje trur dei har dårlegare liv no enn om Hardangerbadet og Hardangerfjord Hotel ikkje var der.