Krafta er vår!

Terje Kollbotn, kommunestyrerepresentant Raudt Ullensvang

Til Ullensvang kommunestyre v/ordførar Roald Aga Haug.

Grunngitte spørsmål til Ullensvang kommunestyre 1. februar 2022.

På bakgrunn av skyhøge kraftprisar og rekordlåge vassmagasin i vårt område, samt stort engasjement og debatt om ein ny norsk kraftpolitikk, vil eg gjerne stille ordføraren fylgjande spørsmål:

Korleis meiner ordføraren at vi best kan få politisk kontroll over dei skyhøge straumprisane og sikre rimeleg og stabil kraft til alminneleg forsyning og industrien?

Korleis meiner ordføraren at vi best kan få regulert krafteksporten frå Norge for å sikre berekraftig fyllingsgrad i vassmagasina våre og unngå import av skyhøge kraftprisar frå kontinentet?

Meiner ordføraren at norsk tilknyting til ACER — EU sitt energibyrå — bør bli avvikla, sett i lys av utviklinga på den europeiske energimarknaden?

Kor stor konsesjonskraftmengd disponerer i dag Ullensvang kommune, og kva kan Ullensvang kommune gjere for at denne konsesjonskrafta blir nytta til beste for innbyggjarane og næringslivet i kommunen?

Kor stor konsesjonskraftmengde frå Ullensvang disponerer Vestland fylkeskommune, og kva initiativ vil ordføraren ta for at denne konsesjonskraftverdien frå Ullensvang blir nytta til utviklingstiltak i vårt distrikt?

I det siste har fleire sentrale politikarar tatt til orde for å byggje ut verna vassdrag som eit svar på straumpriskrisa. Partiet Høgre har foreslått at også Opo-vassdraget i Odda blir vurdert for ny kraftutbygging. Vil ordføraren på nytt opne opp for kraftutbygging i det verna Opo-vassdraget?