Kan kommunehuset i Jondal framleis nyttast?

Kommunestyret i Ullensvang vil vurdera sal av kommunehuset i Jondal.

Eg meiner det er feil å vurdera sal i det heile. Dersom huset vert selt, vil det ha store negative konsekvensar for Jondal. Det må vera mogeleg å organisera administrasjonen slik at huset kan halda fram med å vera i bruk.

I mitt yrkesaktive liv arbeidde eg i staten. Hovudkontoret låg i Oslo, medan arkiv-/postavdelinga låg langt frå hovudkontoret. Det same galdt også for løn til alle tilsette. I prinsippet kunne ein med fordel fungert hatt ei tilsvarande organisering og desentralisering i ein kommune som Ullensvang.

Kommunehusa i Jondal og Kinsarvik kan fungera som avdelingar knytte til rådhuset i Odda, der rådmannen sin stab er samla. Det er fullt mogeleg for avdelingane å ha til dømes faste møte med hovudadministrasjonen ved hjelp av audiovisuelt utstyr. Digitale møte aukar effektiviteten og sparar særleg tid med tanke på køyring for dei tilsette. Det er berre spørsmål om vilje til organisering. Her kan rådmannen vera kreativ og finna tenesteområde som kan verta utførte like godt for innbyggjarane frå kommunehusa i Jondal eller Kinsarvik.

Kommunen har nettopp rusta opp skulen i Jondal og bygt fleirbrukshall. Dessutan har bygda ein forholdsvis ny barnehage og sjukeheim. Det har hatt positive verknader for denne delen av kommunen. Jondal har også vorte liggjande meir sentralt enn tidlegare då mange nyttar veg mellom aust/vest (jf. «arm mot Bergen»). Godt ferjesamband gjer at mange frå Kvam pendlar til Jondal. Det verkar lettare å få dekt ledige stillingar her jamført med indre delar av kommunen. Også ny tettstadplan for Jondal sentrum vil truleg ha positive ringverknader med auka tilflytting og trivsel. Naturtilhøva gjer også at ekstremvêr ikkje er så omfattande som i indre strok.

Ved å satsa meir på Jondal har eg stor tru på at det vil det bidra til å oppretthalda folketalet i Ullensvang kommune. Såpass optimistisk er eg.