Jondalslaga avslutta fotballsesongen 2024 med storslått markering

Jondal idrettslag, fotballgruppa

For å markera slutten på ein innhaldsrik fotballsesong, samla me alle laga til ein stor avslutningsfest på bana.

På tvers av alderstrinn stilte spelarane til felles oppvarming før det vart spelt kampar der yngre og eldre spelarar fekk prøve seg saman og mot kvarandre. Stemninga var på topp då heile 64 fotballspelarar var samla.

Etter den felles fotballmoroa fekk alle deltakarane nyta pizza, før G14-laget skulle få bryne seg i ein intens kamp mot trenarane (og nokre foreldre). Kampen vart prega av høg innsats og god stemning, og det var til slutt G14 som kunne gå smilande heim med siger.

For å gje spelarane ein liten pause mellom kampane, var det lagt opp til ein kreativ natursti rundt bana. Her kunne spelarane testa kunnskapane sine om fotballens Fair Play-reglar. Etter naturstien kunne alle deltakarane gå til kiosken og få ein velfortent premie i form av sjokolade, noko som var populært.

Trenarane vart på tampen av kvelden heidra av spelarane med bølgja!

Nokre av laga vil halde fram med treningar ei stund til før dei tek ein velfortent juleferie. Men planlegginga for neste sesong er allereie i gang, med nokre små justeringar.

Frå neste sesong vil også 1.-klassingane få moglegheita til å vera med på treningar saman med 2. klasse. Dette gjer at dei aller yngste spelarane får ein tidleg start på fotballgleda og kan utvikle ferdigheiter i lag med jamaldrande.

For 3. og 4. klasse vert det endringar i 2025-sesongen. Dei skal organiserast i reine gutelag og jentelag. Jentene held fram med 5-er fotball, med Øyvind som trenar og kampdagar som før. Gutane, derimot, tek steget opp til 7ar- fotball og skal meldast på i seriespel, med Joachim som trenar. Dei resterande laga held fram som før inntil vidare.

Det har vore ein spennande sesong for jondalslaga, med både oppturar og sigrar for alle lag. Innsatsen og idrettsgleda har vore stor, både på treningar og i kampar.

No ser både trenarar, spelarar og foreldre fram til neste sesong, der dei håpar på å bygge vidare på det gode samhaldet og entusiasmen frå årets sesong.