Internasjonal kultur stråla då engasjerte samla seg til korgafest

– Dette var den perfekte avslutninga på eit fantastisk kjekt arrangement for familien, seier Aman Negasi etter å ha vunne hovudpremien på basaren.

Mange engasjerer seg i Kvam for å ta godt imot personar med innvandrarbakgrunn. Derfor kom det ein idé frå Eli Tveitane om å laga eit felles arrangement. Det førte til at om lag 70 personar samla seg i Norheimsund bedehus 4. desember, kor ein stor del av kvemmingane som var til stades, har innvandrarbakgrunn. Det kom deltakarar frå samlingar som blir haldne på Strandebarm bibliotek, Norheimsund bibliotek, Norheimsund kyrkje og Norheimsund bedehus kor organisasjonane Grannehjelpa, Arbeidernes opplysningsforbund (AOF) og Kristent Interkulturelt Arbeid (Kia) er engasjerte.

– Det var eit strålande arrangement, og veldig oppmuntrande med så stort oppmøte, fortel Eli.

Variert program

På programmet stod blant anna ein ukrainsk pianist på seks år, ein 12-åring frå Ålvik som spelte «Prelude» av Johann Sebastian Bach, solosongar på norsk og ukrainsk, basar, stolleik og stor variasjon av mat og bakst. I tillegg var det ein samtale på scena med Alton Beer som fortalde korleis det var å koma til Noreg. Her har han etablert seg med familie i Øystese og jobbar i helsesektoren.

– Eg kom fyrst til Odda, og der snakka nesten ingen til meg før eg kom i avisa fordi eg skåra mål som fotballspelar. Så flytta eg til Kvam, kor folk opnar seg mest opp til meg når eg står som dørvakt på Naboen pub, men folk er mykje meir interesserte og hyggelege her enn i Odda, fortalde han på scena.

Før neste musikkinnslag på scena tok fiolinist Anne Knutsson mikrofonen.

– Takk for at du deler frå di spanande reise, Alton, men eg må berre seia ein ting. For ja, eg bur i Strandebarm, men eg kjem frå nettopp Odda!, seier ho til høglydt latter frå salen.

Stolleiken

Anne akkompagnerte både song, piano og annan levande musikk til stolleiken på scena. Det var kjekt for alle borna som deltok, og ekstra stas for vinnaren Fia Johanne Berge som slo storebroren sin, Torian, i kampen om den siste stolen.

– Korleis var det å vinna stolleiken?

– Det var veldig kjekt å vinna, for eg pleier aldri å vinna i stolleiken. Og no slo eg til og med broren min!

– Kva synest du om arrangementet?

– Det var veldig kjekt, og spesielt kult å høyra at ungar kan bli så gode på piano, seier Fia Johanne.

Mange med flyktningbakgrunn

Blant deltakarane var det mange som kom frå Ukraina, og dei øver stadig på musikk i Norheimsund bedehus i samarbeid med AOF. Dei har uttrykt stor takksemd for arrangementet via takkebrev i etterkant. Dei skriv at det var ein morosam og hyggeleg fest for både store og små, med nydeleg mat og hyggeleg prat. Det var og flott å oppleva basar med årer for fyrste gong, som blei delte ut gratis, og mange fekk med seg små premiar heim att. Fleire uttrykte ynske om at dette kan arrangerast fleire gonger.

– Blir det fleire slike arrangement?

– Ja, om folk vil, så er me klare, seier engasjerte Eli.