Inspirerande kjendisar

Born kan verta rastlause i desember. Dei gler seg til jolaftan, og familiane har gjerne vanskar med å finna på noko å fylla adventstida med. Då er det godt å henta inspirasjon frå kjendisprogram.

Kjendisboksing, til dømes, høyrest spanande ut. Konseptet går ut på at kjendisar utan boksetrening skal snøra på seg boksehanskar og delja laus på kvarandre. Hen som slår hardast, vinn (sjølvsagt). Slike kampar kunne kanskje skipast til i storfamilien ein hustrig adventskveld?

På boksekvelden burde heile slekta samlast rundt kamphanane eller -hønene i stova, med boksering opprigga, sirkla inn med blinkande lyslenkjer og «Det lyser i stille grender» frå høgtalarane. Først måtte ein sjølvsagt forvissa seg om at salmetonar ikkje verkar forstyrrande for kampen, då. Vinnaren burde få ein saftig pengepremie, samla inn på boksekollekt frå dei næraste, inkludert syskenborn. Reine jolaftanstemning!

Elles kan ein òg finna inspirasjon frå konkurransane på «24-stjerners julekalender» hjå NRK, der kjendisar byr på seg sjølve og vel så det. Ei tevling gjekk ut på å fanga mest merksemd hjå programleiarane i tre minutt, utan å bruka lyd. Då reiv kjendisane ned kledestativ, deiste til kvarandre på ulike kreative måtar og velta seg rundt på golvet med rekvisittar frå kostymelageret til statskanalen. Dette kan lett kopierast av norske menn (og kvinner) i hus og hytte. Ikkje treng ein kjøpa noko nytt, ikkje treng ein førebu seg, ein kan berre lata ungane herja fritt i tre minutt og sjå kven som er flinkast til å toska seg og ramponera stova.

Kvar adventsdag må éin deltakar gje seg i NRK-konkurransen, men dette kan norske familiar få problem med. Korleis skal ein få tak i 24 slektningar som vil vera med i tevlinga, og kva seinskadar kan familiemedlemmene som sit igjen åleine på jolekvelden, verta råka av?

Me har diverre få kjendisar i Noreg, så dei fleste må brukast om igjen i ulike program år etter år. Gjenbruk er bra for miljøet, og TV-publikummet får ofte gleda av å sjå nye sider hjå dei talentfulle kjendisane våre. Slike adventsprogram kveikjer lun jolestemning i heimane.