Ikkje rør dei verna vassdraga i Vestland!

Jeanette Syversen, gruppeleiar Raudt Vestland og 3.-kandidat til Stortinget frå Hordaland

Rita Tonning, fylkestingsrepresentant Raudt Vestland og 1.-kandidat til Stortinget for Raudt Sogn og Fjordane

Regjeringa har sagt at den ville verne 30 % av naturen, men vil ikkje sette inn ambisiøse mål og tiltak for korleis dette skal gjerast, ei heller for vern av havet. Dette er for svakt! For det er godt dokumentert at naturen totalt sett allereie er tungt beslaglagt. Med naturmeldinga frå regjeringa er vi i Raudt bekymra for at presset på natur totalt sett vil auke heller enn å stoggast. Vi risikerer med den nye naturmeldinga at utbygging av vindkraft, linjenett med monstermaster, datasenter, hyttefelt, næring, gruvedumping og lagring av giftig avfall, for å nemne noko, vil trumfe naturomsyn.

Nedbygginga av naturen vår skjer dessutan stykkevis og delt, i eit tempo som trugar heilt kritiske økosystem for fauna og dyreliv med å kollapse, og vassdraga våre er kritiske årer som bind land og hav saman i eit skjørt, samanfletta krinsløp. Alt heng saman. 

I Norge har vi rundt 390 verna vassdrag, og 58 av desse ligg i vårt fylke, Vestland. Om verneplanen skriv NVE dette: «Vernet gjelder først og fremst mot vannkraftutbygging, men verneverdiene skal også tas hensyn til ved andre inngrep.» 

Tysdag 11. februar står dette varige vernet i fare for å verte utsletta med eit pennestrok i Stortinget, om fleirtalsinnstillinga frå energi- og miljøkomiteen blir vedtatt den dagen.

Partia som no føreslår å fjerne det vi alle trudde var eit varig vern av dyrebare vassdrag for framtidige generasjonar, må svare for seg! 

Når allereie verna naturareal i fylket vårt no vert truga av eit særs interessant fleirtal i Stortinget, vil vi vite: Kva verna vassdrag vil Frp, Høgre, Arbeidarpartiet, Senterpartiet og Kristeleg Folkeparti bygge ut i Vestland? Innbyggjarane her i fylket har interesse av å få dette heilt klart føre seg, no som desse partia går inn for å fjerne det varige vernet av heilt unike og verdifulle vassdrag. 

Blir det: Nausta, som renn ut i Førdefjorden, Strynevassdraget, Dalsbøvassdraget i Stad, Vosso på Voss, Øystesevassdraget, Oselva i Bjørnafjorden, Flomselvi, Nærøyfjordselvi i Aurland, Etnevassdraget eller Opo i Odda? Lista over heilt unike, verna vassdrag er lang, kor mange og kva vassdrag vil desse partia ofre? 

Raudt kan garantere at vi vil kjempe både i Vestland fylkesting og på Stortinget for å skåne kvart einaste verna vassdrag!