Helsing frå LLA

Tomas Bruvik, generalsekretær i Landslaget for lokalaviser

Redaktøren i Hordaland Folkeblad har ytra ønske om ei lita helsing frå Landslaget for lokalaviser eller, som han kallar det, eit tingingsverk til 150-årsjubileet. Slike helsingar skriv vi nokre av, men vi har aldri skrive til ein 150-åring tidlegare. Vi har heller aldri før fått beskjed av redaktøren om at vi helst ikkje skal skryta av avisa som jubilerer.

Hardanger er heldig som er omkransa av lokalaviser, gode lokalaviser, forskjellige lokalaviser. Av dei som har hatt lokalavis aller lengst her i landet, er innbyggjarane i Kvam. Det er ofte noko ein ikkje tenkjer på – kor viktig det er faktisk å ha ei lokalavis i nærmiljøet. Korleis hadde eigentleg samfunnet vore utan Hordaland Folkeblad? Kven hadde då skrive om det som skjer på skulane, i kommunestyresalen, på fotballbanen eller teaterscena? Mest sannsynleg hadde ingen då skrive om det.

Skal vi ha eit levande lokaldemokrati, så er ein avhengig av å ha ei god lokalavis, og det har Kvam, verkeleg (beklagar skrytet, Sigbjørn). Avisa er solid redaksjonelt, og marknadsavdelinga blir sett opp til av aviser frå heile landet. Dei seinare åra har Hordaland Folkeblad fleire gonger vunne LLA sin marknadspris.

For lokalavisene er det svært krevjande tider der ein står i ein spagat mellom papiravisa og den digitale avisa. Lesarane på papir blir færre og økonomien er tøff, dermed er det svært viktig å vera gode også digitalt. For uavhengige, privateigde aviser som Hordaland Folkeblad er det ekstra krevjande å stå i denne situasjonen. Når ein ikkje er del av eit konsern, må ein ta alle val sjølv og har det langt meir krevjande enn aviser eigde av eit konsern. Så langt har avisa klart dette på glitrande vis, men det krev mykje arbeid og stor innsats. Vår oppmoding til lokalmiljøet er ta vare på lokalavisa. Abonner, anten det er digitalt eller på papir!

Eg ønskjer å gratulera både innbyggjarane i Kvam, eigarar av avisa og alle dei tilsette med den store dagen. De skal vera stolte, alle saman.

Hjarteleg til lukke med jubileet!