ORDSKIFTE
Heldige oss som har Hardangerbadet
Hardangerbadet er eit fantastisk prosjekt me kan vera stolte av i Kvam. Takka vere offentleg/privat samarbeid var dette mogleg.
Eg høyrde litt på debatten i formannskapet og at vår gode varaordførar uttala at han fekk mykje kjeft på grunn av handteringa av saker som hadde med Hardangerbadet å gjera. Eg sa at han burde svara alle som kjefta på han med fylgjande: Kjøp årskort og bruk badet slik at du kan vera med og bidra ørlite til at dette går bra!
Trøysta mi er at badet står der og vert ikkje rive ned att. Og vatn trur eg det alltid vil vera i det.
Er òg spent på om det er Raudt sin politikk at badet skal stengjast og all symjeopplæring skal føregå i Strandebarm.
Eg lurer på om dei som skriv og meiner dette, har vore innom badet og sett korleis folk i alle aldrar kosar seg der. Og alle skuleklassar, alle treningsgrupper, alle terapitimar. Hardangerbadet styrkjer folkehelsa i Kvam.
Eg er oppvaksen på Kjosås, og der laga me våre eigne basseng ved å demma opp ein bekk slik at det vart ein liten høl å bada i om sommaren når dei vaksne skulle kvila middag. Men nokon stor symjar vart eg ikkje.
Men eg har hatt og har stor glede av Hardangerbadet og vil oppfordra alle pensjonistar i Kvam: Kjøp årskort og kom deg i badet! Nokre hundrelappar pr. månad og bad så mykje du vil!
Kvam herad gjekk inn med 25 millionar pluss tomt. Mange private, med Trond Mohn øvst, har gått inn med kapital.
Mange har stllt underskotsgaranti. Det står det respekt av. Mykje meir enn alle dei som kjeftar på Frode Nygård og kjem med useriøse innspel både i avisa og kommentarar på Facebook.
Gode kvemmingar. Hardangerbadet er ein fantastisk plass å vera for store og små, unge og eldre. Og eg spør meg kva alternativet er eller skulle vera: At Kvam herad skulle byggja nytt basseng åleine til 100 millionar.
Her har me fått eit fantastisk bad og i same farten nyoppussa hotell, lege og tannlege m.m. Resultatet er arbeidsplassar og skatteinntekter til kommunen.
Eg har stor tiltru til at ordførar og politikarane tek kloke avgjerder i sakene dei skal handsama framover. Også når det gjeld framtida for Hardangerbadet.
Takk til alle som jobbar der og gjer det til ei flott oppleving å vera der!
Eg var tidlegare politikar nokre år som var lærerike og interessante. Me bur i ein god kommune. Ved flytting frå Kjosås til Løyningshaug ved Fitjadalsvegen vart det sjølvsagt mykje rydding av eitt og hitt. Der fann eg ei helsing eg fekk som politikar. Diverre anonymt. Skulle gjerne teke ein kopp kaffi og ein hyggjeleg prat med vedkomande.
Og sidan KrF har vore litt i fokus i det siste av ymse grunnar sluttar eg av med dette brevet eg fann i flyttesjauen. Ikkje gjer som vedkomande overfor politikarane.
Kan gå litt varmt for seg også blant KrF-medlemer.
Til Harald Kjosås! 10,11,08
Du og en duo skyndet dere å starte byggingen av Øystese-skolen før det nye heradsstyret var etablert: Et kupp!!
Du: Kristelige Folkeparti-mann.
Jeg har vokst opp i et Krf-hjem. Jeg har jobbet mye for partiet.
Har vært stolt av det.
Du gjorde et kupp. Du «vinner» nok i morgen. Det blir nok spart inn noen penger, men tenk på det hat du har skapt mellom Norheimsund og Øystese. Det kan vare i hundreder av år.
Bygdene har levet godt sammen i mange år før du føretok kuppet. Du Kristeleg Folkeparti-mann. Har lyst å kalle deg en klyse. En skam for KrF.
Fant ikke telefon eller adresse på deg i telefonkatalogen.
Ikke rart. Feiging. (har ikke internett)
Gjem dei i mange år.
Gustava Karlsen
(Psev)
HF gjer merksam på at redaksjonen har sett det siterte brevet i original utgåve. Red.
