Heimsyn

Sist veke inviterte Kabuso til ei omvising av det store arbeidet til Brynhild Grødeland Winter, kalla «Heimsyn».

Heimsyn er ei frise av skikkeleg stort format, med ei lengd på 35 meter, og ei høgd på 3 meter. Heile frisa dekker såleis den store langveggen i utstillingssalen.

Grødeland Winter er teiknar fortel omvisar, men her er det fargar som dominerer, fargeskrinet har vore flittig i bruk, der blyanten elles har vore reiskapen.

Sjølv seier Brynhild at ho ser Hardanger frå utsida, som ei slags hovudpulsåre i vår kulturelle identitet. Det er ei reise gjennom landskap, minne og mytar, forklarar ho.

Her finst innslag av popkultur, kunst og historie i «Heimsyn».

Og kva ser vi? Her er fiskar frå havdjupet med tenner som kan skremma nokon kvar, medan landskapet elles viser dyr du ikkje finn i Hardanger. Ulvar, elg, kanskje ein bisonokse. Men så dukkar ein kanin opp, med ein større fisk i famna. Kanskje kaninen har fått nye matvanar?

Finn vi så innslag frå bygda? Vi får sjå. Om ein leitar, dukkar Ingebrigt Vik museum opp, vidare eit tun som har likskap med Eikjelid-tunet, andre stader ein gardsbygning.

Vi kunne òg sjå noko som minner om utskjeringar. Desse hadde likskap med utskjeringar, lik dei vi ser på stavkyrkjene våre, t.d. i Borgund og på Urnes. Begge med flotte utskorne portalar kring inngangen.

Så dukkar det opp eit bilete som liknar på sjølve det norske ikon biletet, «Brudeferden i Hardanger». Innramma, må vita. Ikkje heilt attkjennande på dette biletet, likevel med ein viss likskap.

Enkelte har meint at naturen i originalen kan minna om Sandvinsvatnet, som ligg opp frå Odda. Men denne brudeferda liknar i alle fall korkje på Sandvinsvatnet eller noko anna. Men eit artig bilete var det i alle fall.

Brynhild Grødeland Winter har si utdanning m.a. frå kunsthøgskulen i Bergen, der ho også bur. Omvisaren vår fortel at ho har arbeidd med dette veggbiletet i to år. Det kunne vi forstå, frisa var imponerande.

Ho har elles stilt ut arbeid på haustutstillinga og vestlandsutstillinga.

Denne står til 29. desember, og det er god grunn til å besøka Kabuso for å sjå «Heimsyn».