ORDSKIFTE
Hardangerbadet atter ein gong …
Det er vel ikkje til å stikka under stol at Hardangerbadet har vore ei heit potet frå fyrste spadetak. Slikt er ein dårleg start på eit prosjekt som burde vore det motsette. Ein del av prosjektet gjekk ut på at nokon måtte leggja ned sine bad, dersom Kvam herad skulle bli medspelar. Dette skapte ikkje noko god stemning i kommunen. Så skulle Kvam herad bidra. Sum: 25 millionar og gratis tomt, blant anna. Der burde det stoppa. No sit Kvam herad i klisteret, som me har åtvara om heile tida.
Vedtaket om å vera med på prosjektet vart gjort med eit knapt fleirtal. Altså ikkje eit samla fleirtal. Slikt skaper heller ikkje noko samhald kommunalt sett om ei så stor sak. Eigentleg hadde ikkje Kvam herad råd til dette, men gjorde det likevel. Ein har ikkje kome på Robek-lista enno, men det er vel ikkje lenge til. Er ikkje det minste stolt over dei som vedtok dette. Slik er det berre. Finansielt er heile det økonomiske konseptet eit «rotihop», spør du meg. Og no ligg ein på kne for å be om hjelp igjen og igjen. Alle kalkylar og overslag var jo berre ein stor bløff, slik det blei presentert. Ein sleit ut ein rådmann som fekk i oppgåve å rekna på det til han såg «fanden» på veggen. Kor dette reknestykket såg ut til slutt, veit ikkje eg, men det var visst godt nok til at heradsstyret kunne gå god for det med eit knapt fleirtal. Slikt er demokrati.
At det er eit flott bygg, er det ingen tvil om. Men det er ein ting de som er så ihuga badeforkjemparar, gløymer. Det er å snakka om pengar/økonomi i dette. De snakkar heller om synergieffektar og ringverknader o.s.v. Men det har me som sit på den andre sida, vore svært opptatte av. Alt skal betalast, og eit slikt anlegg går sjeldan i pluss. Heller det motsette. Dette har me gitt uttrykk for jamleg, og no ser det ut til å bli berre verre og verre. Då har me blitt kalla grinebitarar, useriøse aktørar o.s.v. Men me er nemleg meget oppegåande, vil eg seia. Det er som å snakka til døve øyre.
Så har det vore snakk om desse underskotsgarantistane skal fasast ut og sleppa eventuelt underskot. Kva er det eigentleg ein driv på med? Berre tanken er jo heilt absurd. Me har fått presentert besøkstal i HF. Det er jo heller ikkje noko særleg oppløftande. Hardangerbadet har skulda på pandemien og liknande, men det trur eg ikkje har noko som helst betydning. Harald Kjosås seier kor fint anlegget er, så dette bør ein nytta seg av. Då er svaret at folk badar der dei har lyst, viss dei har lyst, og handlar der dei vil. Har ein nokon gong gjort nokon undersøkingar av kor stor interessa for dette er, eller er det berre «tatt ut av lufta» og synsa nokon tal?
Men no står dette bygget der, så vil tida vise om folk ynskjer å bruka det meir. Eg trur òg at det som skulle bli eit flott «kvammabad», heller blir oppfatta som eit «Øystese» sitt bad hos mange i heradet. Desse synspunkta i HF kom jo sjølvsagt no i forbindelse med dei sure innsparingane. Kanskje det hadde vore best å ikkje skriva noko om dette badet i det heile. Eller har de fått panikk? No får de svar både her og der. Eg er faktisk heilt einig med Jostein Rønhovde i det han skriv. Då er vel eg og ein mobbar då, Kjell Reidar Huus? De får berre leva i dykkar boble så lenge de vil, mens me andre lever i verkelegheita.
