«Fossar fram» over stokk og stein

Er det ein lege i salen? blir det ropt når situasjonen tilseier det. Akkurat no vil eg rope: Finst det ein god økonom her? Eg viser til sak om nytt Fosse-senter i HF 6.12.

Kjære Fosse-Stiftinga og ansvarlege politikarar, gi oss eit vurderingsgrunnlag å bli kloke på! Kor er det blitt av høyring, innspel og open prosess? Her må nokon ha snakka tett saman på gangen. God vilje er vel og bra, men konkret informasjon trengst.

Medan heradsbudsjettet er under press, Hardangerbadet blør og ingen veit endelege utfall, tilrår altså fylkesutvalet einstemmig å nytta skuletomta på Tangerås til nytt Fosse-senter. Kostnad: Ukjent. Senteret skal delfinansierast av kommunale midlar. Besøkstal og investeringar er avgjerande for ei realistisk vurdering. Likevel finst ikkje slike overslag. Utvalet sitt vedtak synest å vera reint kjenslestyrt.

På Tangerås-tomta ligg to eldre skulebygg med rundt 3.000 kvadratmeter areal (HF, 21.11.) som har varierande, til dels skrikande, vedlikehaldsbehov. Kanskje må delar av bygga rivast før eit nybygg ser dagen.

Trond Mohn vil gi vekk sin del av eigedomen «gratis». Gratis læt vel, men hallo, folkens! – gratis i denne samanheng gjeld berre tidspunkt null i prosjektkalkylen. Alle veit at «gratis lunsj» har ei bakside. Kostnadar knytte til regulering, planar, arkitektar, bygging, drift, utvikling og anna – la oss få sjå dei! Einaste talet som har vore framme i saka (i alle fall i HF), er «kalkulert renovering av bygga på skuletomta [til] 158 millionar kroner utan moms.» Smak litt på det talet. Viss talet er feil, vis oss kva som er rett, og kvifor.

Før midlar frå fellesskapet blir brukte på eit slikt prosjekt, forventar eg å sjå eit grunnlag som viser kostnadar og inntekter.

Eitt Fosse-hus eksisterer allereie, takka vere stor innsats frå eldsjeler lokalt. Naboeigedomen til Fosse-huset er visstnok tilbydd Fosse-Stiftinga vederlagsfritt. Den har ein brøkdel av skuletomta sitt areal å hanskast med. Kva for vurdering er gjord av utviklingspotensialet? Ein tredje eigedom som kan bli lagd til Fosse-Stiftinga, er tunet der Jon Fosse vaks opp. Dette bruket vil sjølvsagt vera juvelen i krona uansett kva anna som skjer. Alle dei tre eigedomane ligg i gangavstand til kvarandre. Er det ikkje fornuftig å vurdera framtidig utvikling og finansiering av desse tre i samanheng med drøfting av eit nytt Fosse-senter?

Slik bakgrunn er ikkje vist til som del av handsaminga i fylkesutvalet. Likevel går utvalet inn for å legge ei omfattande tomt med ditto bygningsareal inn i eigedomsporteføljen til Fosse-Stiftinga. Visst er Jon Fosse ein stor skald, men imperiebygging er liksom ikkje i hans and.

Meir handfaste data trengst for å grunngi den fylkeskommunale godviljen. HF skal ha ros for å ha prøvd. Dessverre utan å lukkast. Ordføraren vår er visst den einaste med beina på jorda. Han gir von om betring ved at «saka må koma tilbake til fylkespolitikarane når vilkåra for å overta eigedomen er klare» og at det «hadde vore ein føremon med ei høyring av forprosjektet og betre prosessar». At fylkesutvalet ikkje etterspurde noko som helst i den leia, er ikkje til å forstå. Det rokkar ved tilliten til systemet og enkelte av våre demokratisk valde politikarar.

Les også: