Ei vrien veke

Me har gjort det. Endeleg! Me har fått på plass dunkar med beredskapsvatn i kjellaren. Nyinnkjøpte, solide dunkar fylt med vatn frå springen. Litt snålt med tanke på vår geografiske plassering, som gir oss fleire meter regn i året, og dessutan sykkelavstand til bekkar, elvar og fossar. Men, tenk om alt utomhus vert utsett for atomnedfall?

Det er Direktoratet for samfunnstryggleik og beredskap som nyleg har sendt oss alle «Slik bidreg du til beredskapen i Noreg»-brosjyren. Vidare må me ha nok mat i hus. Det må vera matvarer som toler lagring i romtemperatur, og som kan lagast til i lyset frå ei hovudlykt og utan oppskrifter eller anna hjelp frå www.google.com.

Matvarene i fryseboksen tel ikkje mykje i denne samanhengen; utan elektrisitet tinar alt. Bålpanna må fyrast opp, og det kan bli grillfest i alle hushald i dagevis. Sikkert er det smart å ha noko magemedisin på lur. Denne kan plasserast i «Reservelageret av legemiddel», som direktoratet tilrår.

Vedstablane kjem til å bli sette på med eit nytt og endå kjærlegare blikk. Likevel er det visst smart å også ha eit straumfritt kokeapparat. Ektefellen fylte år, og jammen vart ikkje gåva ein liten gassbrennar. Men 110 gram isobutan held visst berre til ørliten skvett varm kaffi dagleg. Her trengst meir førebuingar for å halda humøret oppe.

Stearinlys i påske- og julefargar fungerer nok greitt heile året. Ullklede har me i alle fasongar og ufasongar. Brettspel og kortstokkar likeins. Med dab-radio på batteri og inga skrolling på mobil gir dette kanskje ei gamaldags hyttekjensle.

Kven hugsar alle siffera i telefonnummeret til bestefar? Rådet er telefonnummer notert på ark, om me må ringje frå ein annan telefon enn vår eigen. Kan ein forresten ringja svigermor frå naudtelefonane i Børvenestunnelen? Litt kontantar er lurt.

Solcellene på taket klarar truleg å produsera elektrisitet, men det hjelper lite når cellene ikkje kan levera energien utan tilgang til straumnettet. Direktoratet hevdar alle bør finna seg ein beredskapsvenn, og her kan nok dei som har greie på off-grid-løysingar, bli særleg populære.

Med tidsperspektiv på ei veke seier ikkje brosjyren noko om såfrø eller setjepoteter.