Ei musikalsk oppleving

Den fann ikkje stad i Grieghallen eller operaen i Oslo, heller ikkje frå nyinnspela CD- plate av Herborg Kråkevik. Men saman med 17 musikarar frå Hardanger Big Band, der nokre framleis er med som byrja karrieren i Jondal under enkle tilhøve i 1987. Initiativtakaren var Arild B. Nilsen, eit musikalsk multitalent, der «intet instrument syntest ham ukjent».

Julekonserten 04.12. i Kabuso starta med det enkle folkemusikkinstrumentet bukkehorn – som Nilsen trakterte. Spennande og rett og slett nydeleg. Herfrå kom enkle tonar i ulike tonehøgder, men utan melodi. Etter kvart kom ein attkjennande melodi, som viste breidda i kva dette instrumentet kunne brukast til, her i samspel med valthorn (?), uvisst ettersom instrumentet var gøymt bak eit notestativ.

Deretter følgde både kjende og mindre kjende julemelodiar. Slik underteikna opplevde det, var dette bandet i ein eigen elitedivisjon. Kraftfull lyd der det var nødvendig, nedtoning der lyden til slutt forsvann nesten lydlaust ut dørene i Kabuso. Me fekk høyra den vakre julesalmen som gav assosiasjonar til krigen i Ukraina, ettersom forteljinga seier at soldatane i skyttargravene frå begge sider i 1. verdskrig let julefreden senka seg over skotvekslinga, der dei saman stemde i julesalmen, der «kanonene kunne stilne på kvelden da englene sang» slik pave Benedikt XV bad om. Det må ha vore ei sterk oppleving for alle soldatane, då dei sjølve song saman.

Hardanger Big Band hadde ei uvanleg høg grad av presisjon, der også solistane kom svært godt frå det. Den eine trombonisten debuterte til og med som solist denne kvelden. Sprekt.

Ei praktfull oppleving for oss alle denne kvelden var framføringa av «Mitt hjerte alltid vanker». Dette er ein salme skriven for 300 år sidan, av den danske biskopen Hans A. Brorson. Her starta dirigenten framføringa av salmen med song utan ord – for så å ordsetja salmen, der han med kraftfull røyst løfta salmen, saman med orkesteret, til ei oppleving ein sjeldan høyrer!

Mange merka seg den høge kvaliteten på Hardanger Big Band under jubileumskonserten i 2022, då dei feira 35 år. Ein kan ikkje anna enn å beundra Arild B. Nilsen for arbeidet han har gjort med dette orkesteret. Berre det å halda liv i det så lenge, er ein bragd i seg sjølv. Ikkje minst når ein kjenner til kvar bandet starta sin karriere, i vesle Jondal med sine om lag 1000 innbyggarar. I dag ein del av Ullensvang storkommune.

Hardanger Big Band (HBB) er nok kjent i visse miljø. T.d. hadde dei julekonsert i Bergen, i Ole Bull teater var det visst, men her burde ikkje eingong Grieghallen vore for stor! Kvaliteten er der, det er berre å få Bergen og Oslo til å forstå kva dei går glipp av. For oss som er så heldige å ha tradisjonen med julekonsert i Kabuso, burde det vera ei oppgåve å snakka varmt om HBB, som ei aldri så lita marknadsføring. Lukke til vidare – men kanskje under namnet Hardanger Storband?