Dette kan umogleg vera lovleg!

Du har kanskje tenkt tanken sjølv? Det er lenge sidan me kunne lesa om elsparkesyklane som kom til storbyane og laga kaos. Dårleg parkering og farleg køyring. Både køyrande og gåande har irritert seg sidan, og mange har hamna på legevakt eller sjukehus etter ulukker. No har dei moderne køyretøya kome til bygda for fullt. Det er fantastisk, er det ikkje?

Eit slikt elektrisk leiketøy tek deg frå A til B på null komma niks. Foreldre slepp å køyra born til aktivitetar, og om borna er på besøk, kjem dei seg heim på eigne hjul. Truleg med same kjensla som ein 16-åring som akkurat har fått mopedlappen: ein sårt sakna og deileg fridom. Og du skal ikkje sjå vekk ifrå at foreldra sit med same kjensla. Det er jo ei investering, sant? Digg for alle partar.

Du finn ikkje eigne fartsgrenser for små elektriske køyretøy, men lovleg toppfart for elsparkesyklane er 20 kilometer i timen. Passerer du gåande på gangfelt, skal det skje i gangfart. Men trillar du fortare i nedoverbakke, er det ikkje fart av motorisert kraft, og då er det lovleg å passera 20 kilometer i timen.

Hjelm er heldigvis ikkje påbode, berre anbefalt som ei slags billeg livsforsikring. Det er jo ikkje akkurat store sykkelhjul ein ferdast på. Kor farleg kan det vera?

Dette vedunderet av eit framkomstmiddel kan du få tak i på internett for tre lappar, eller du kan slå til og bruka femten. Dette er prisar i kategorien «Lovleg elsparkesykkel», vel å merka. På same nettsida er det nemleg fire andre kategoriar som også freistar: «Ekstrem rekkevidde», «Premium scooters», «High end scooters» og «Ultra performance».

Kva er vel betre enn å kjenna vinden under armane og to fluger i halsen, midt i vegen mellom bygdene ein fredags ettermiddag? Gjerne med to kompisar på moped ved sida av.

Det meste verkar å vera lov så lenge ein køyrer fint. Og ikkje gløym at dette er miljøvenleg. Men kva vil det seia å køyra fint? Og om ein er uheldig og krasjar inn i noko eller nokon, edru eller ikkje, kva skjer då, eigentleg?

Ifylgje Trygg Trafikk er det ti gongar høgare risiko for å verta skada i ei ulukke med elsparkesykkel enn vanleg sykkel, og risikoen er over tre gongar så høg om natta. For ja — flest ulukker skjer nattetid. Men du skal ikkje køyra i ruspåverka tilstand, står det på Statens Vegvesen sine sider. Har du ikkje kontroll, må du trilla han. Men er det ulovleg?

Det er ei skjønnsmessig vurdering av fleire moment. I det alkoholen reduserer konsentrasjons- og reaksjonsevna betydeleg, vert ein fort rekna som uskikka når ein har over 0,2 i promille, ifylgje politiet.

Om du ikkje køyrer aktsamt og omsynsfullt, kan du verta rekna som uskikka og risikera bot eller fengsel på opp til eitt år. I normale tilfelle vil det medføra ei bot på mellom 8.000 og 10.000 kroner. I tilfelle kor ein påfører andre alvorlege personskadar, risikerer ein vilkårslaust fengsel.

Du har ansvar for eiga sikkerheit, og utanom det gjeld det altså berre å køyra aktsamt og omsynsfullt og fylgja trafikkreglane. Det klarar vel både vaksne og born? Elsparkesykkel har nemleg ingen nedre aldersgrense. Trygg Trafikk har likevel våga seg ut med ei anbefalt aldersgrense på 12 år.

Det eg vil fram til er: Tenk deg om. Ver forsiktig. Bruk hjelm.