ORDSKIFTE
Bygg byggjesak i Blåhuset!
Ei av kommunane si viktige oppgåver er å bidra til samfunnsutvikling. Svein Johan Bakke stiller i lesarinnlegg (HF 31.12.) spørsmål om kommunehuset i Jondal, eller Blåhuset på folkemunne, framleis kan nyttast i forvaltninga av kommunen? Han har fleire gode perspektiv og argument for at svaret bør vera ja.
I intensjonsavtalen som låg til grunn for folkerøystinga, og deretter samanslåinga til Ullensvang kommune, vart det slått fast at Ullensvang kommune skulle vera ein desentral kommune. Både kommunehusa i Kinsarvik og Jondal skulle nyttast vidare. Planavdelinga i den nye kommunen skulle m.o.a. liggje i Blåhuset. Det har ikkje skjedd. Det er for dei aller fleste ei godt bevart hemmelegheit kva som føregår innanfor dei veggane.
I motsetnad til Bakke så var det over 50 prosent av oss innbyggjarane i tidlegare Jondal kommune som ikkje trudde på dette. Diverre så fekk me så langt rett. No er huset føreslått selt.
Gode administrasjon og folkevalde: De som la grunnlaget i intensjonsavtalen, har no høve til å syne at de faktisk meinte alvor i samanslåinga!
Kva med å flytta byggjesaksavdelinga i kommunen til Blåhuset i Jondal?
Gjennom ulike innlegg i lokalavisene, i møte med innbyggjarar, og gjennom erfaringar synest det klart at det er det ein jobb å gjera med å byggja ei velfungerande byggjesaksavdeling. Ei avdeling som skal bidra til vekst og utvikling av heile kommunen. Rådmannen har eit uttala mål om at Ullensvang skal verta noregsmeister i byggjesak. Eg heiar på deg!
Når ein kultur har sett seg litt for godt i veggane, må ein gjerne gjera ei skikkeleg opprydding. Er problemet av digital art, er ofte det enkle og det beste svaret å restarte.
Kva med å restarte byggjesaksavdelinga på Blåhuset i Jondal?
Det er fleire gode argument for ein ny start.
Her er eit velfungerande kontorfellesskap, godt vedlikehalde hus, som er geografisk plassert i ein større arbeidsmarknad. Ein ny leiar for plan og samfunn kan starte kulturbygginga mot noregsmeistertittelen i byggjesaksbehandling innanfor nye vegger.
Sp/Ap-regjeringa har nyleg vedteke nye planretningsliner som gjev kommunar som Ullensvang langt større fridom til å planleggja ut frå lokale behov. Det vil måtta bety ei heilt ny tilnærming også frå administrasjonen.
Ein ny restart av byggjesak kan også i større grad fokusera på plan- og bygningslova sitt føremål: § 1-1 «Loven skal fremme berekraftig utvikling til det beste for den enkelte (mi understreking) samfunnet og framtidige generasjonar.» Etter alle avisoppslaga og samtalane på Coop-en må ein restart fokusera i større grad på lova sitt første føremål, til det beste for den enkelte. Det må verte enklare å få byggja og driva næring i heile Ullensvang!
Mitt nyttårsynske er at alle som ynskjer å kjøpa ferdig regulerte hustomter, må få løyve på dagen!
Lukke til med å følgja opp intensjonsavtalen for Ullensvang kommune!
