Barnehageopptak

Anita Hesthamar

Rådmann i Kvam herad

I lesarinnlegg i HF 17.2.23 stiller Beate Gauden spørsmål om det er openlys forskjellsbehandling i barnehageopptak.

Retningslinjene våre for opptak er heilt opne og ligg tilgjengelege for alle på nettsidene til Kvam. I tillegg til dei lovpålagde kriteria om prioritering av born med nedsett funksjonsevne og born med vedtak etter lov om barnevernstenester har Kvam nokre kommunale kriterium.

Det fyrste på lista er at minoritetsspråklege born med foreldre som følgjer introduksjonsprogrammet, skal prioriterast. I 2022 kom seks nye born innunder denne prioriteringa. Kor mange det vert i 2023, veit me ikkje enno.

Ut frå personalsituasjonen i dag er administrasjonen si vurdering så langt at mottak av flyktningar i 2023 vert krevjande. Me kan klara å ta imot 50 prosent fleire flyktningar enn i eit normalår, men ikkje 200 prosent slik situasjonen er no.

Barnehagane har fått tilført auka økonomiske rammer for å kunna gje tilbod til alle som ynskjer det, og ikkje berre dei som har krav på plass etter lova. På grunn av manglande personale måtte me diverre seia nei til fleire familiar som ynskte, men ikkje hadde krav på plass i 2022. Det galdt både flyktningfamiliar og andre familiar.

Kapasitetsmangelen er der til trass for at utviding av barnehagetilbodet i kommunen er høgt prioritert, både administrativt og politisk. Ei rekkje tiltak er sette i gang, som:

• Høgare bemanning enn lovkrav

• Utvida tal på opptak i året til fire

• Satsing på lærlingar og fagbrev

• Utvida administrative ressursar i barnehagane til å arbeida meir med mellom anna rekruttering

I tillegg har me eit eige prosjekt i barnehagane for å redusera sjukefråvær.

Me har alle vore gjennom ein lang periode med pandemi og høgt sjukefråvær, og står no overfor ein situasjon med låg arbeidsløyse og mangel på personale i fleire bransjar, noko ein ser i heile landet. Også i Kvam har det ført til at me ikkje har fått tak i tilstrekkeleg med tilsette. Me har likevel tru på at tiltaka me er i gang med, vil gje resultat og føra til auka kapasitet i barnehagane våre. Då kan me på ein ansvarleg måte igjen ta godt imot alle som ynskjer barnehageplass i Kvam.