Barnehageborn på krubbevandring

Roar Strømme, vikarprest i Kvam

«Nå vandrer fra hver en verdens krok … til krybben hen», syng me i den gamle julesongen. I Kvam har i alle høve barnehageborna lagt ut på vandring til julekrubba. Alle barnehagane, med 230 barn, har såleis hatt krubbevandring no i desember. Dette fortel kateket Mampion Andriamandimby og truslærar Bryna Opdal, som hatt det kyrkjelege ansvaret.

Dei aller fleste av dei 13 samlingane har vore i kyrkja, slik at borna også har fått oppleve det spesielle ved å vere i kyrkjerommet. Men anten vandringa har vore i kyrkja eller barnehagen, har borna med stor entusiasme tatt del i dramatiseringa av juleevangeliet. Slik har dei fått agere Maria, Josef og Jesus-barnet, gjetarar, vismenn, englar og alt som høyrer til. Det er gjerne ein heil sjau med både kostyme og rollefordeling. Men resultatet vert ei levandegjering av den tidlause forteljinga, som borna tydeleg gler seg over å få del i. Tilbakemeldingane frå både born og tilsette er såleis gode, og for dei kyrkjelege tilsette er dette eit årleg høgdepunkt i adventstida.