5 år sidan jordskjelvet i Nepal

25. april 2015 råka det største jordskjelvet på 85 år Nepal. For oss som var der, kjem denne datoen kvart år med mange minne. Naboar som mista alt dei hadde, netter under presenning i hagen, tett i tett med våre nepalske naboar, kraftige etterskjelv som aldri gav kroppen kvile, uvissa og alle meldingane frå vener som ikkje visste kvar dei skulle ta vegen. Det var krevjande og skremmande dagar for alle. Bygningar og infrastruktur blei øydelagde, mange mista livet eller blei skadde, og endå fleire var i sjokk og trong akutt hjelp. Etter at den akutte krisa med mange etterskjelv hadde roa seg, tok det tid før gjenoppbygginga av landet kom i gang. Folk levde i provisoriske plasttelt og under presenningar i månadsvis. HimalPartner var heile tida til stades og deltok i aksjonen «Gjenreis Nepal.»

I episenteret for jordskjelvet blei mange skular øydelagde, og styresmaktene kom etter kvart på banen med planar for oppbygging av meir jordskjelvsikre bygningar. Gjennom innsamla pengar i Norge bidrog HimalPartner til gjenoppbygging av 8 skular ved hjelp av lokale handverkarar. 6 av desse blei tekne i bruk i desember.

To snikkarar frå Møre skulle i desse dagar vore på plass i Nepal for å lære opp lokale entreprenørar i bruk av utstyr på ein nybygd møbelfabrikk, men deler av utstyret til fabrikken er no pandemifast i India og snikkarane er pandemifaste på Møre. Det meste er sett på vent – i Nepal som i Noreg.

Framnes kristne vidaregåande skule samla inn imponerande 1 million kroner gjennom russeprosjektet sitt i 2018. Dette er brukt til kjøp av land for å byggje eit rehabiliteringssenter for psykisk sjuke. Eit utrøytteleg arbeid for å endra haldningar til personar med psykiske problem, har gitt mange eit nytt liv.

Fem år er gått, eit gedigent gjenoppbyggingsarbeid er gjennomført og føregår framleis etter det store skjelvet som tok livet av over 7000 menneske og rysta ein heil nasjon. Femårsmarkeringa skjer i eit land som er totalt stengt ned av koronaviruset. Folk som så vidt hadde kome seg på beina, starta eit nytt liv og skaffa seg inntekt, er nok ein gong hardt ramma. India har stengt grensene, og det er vanskeleg med transport av viktige varer som mat og drivstoff. Prisane stig og for dagarbeidarar som lever frå hand til munn, bankar svolten raskt på døra.

Men Nepal har greidd seg gjennom kriser før og vil greia det igjen! I Kvam er alle dei 4 kyrkjelydane med i Samarbeid Menighet og Misjon (SMM) og bidreg saman med HimalPartner til ei betre framtid for folk i Nepal. Vi er takksame til alle dykk i bygdene her som støttar arbeidet i Nepal.