Jaktar på dei stilige lastebilane
Nokre samlar på frimerke, andre på videoopptak av lastebilar.
Har du sett to gutar stå langs vegen i Norheimsund og speida etter eit eller anna? Kanskje står dei ved Esso-stasjonen i Grova, kanskje står dei ved Rema 1000, eller kanskje står dei ved YX-stasjonen i Steinsdalen.
Sjansen er stor for at det er Sander Høgenæs Laupsa (12) og Oliver Flagtvedt (13) du har sett. Gutane har nemleg ein hobby litt utanom det vanlege: Dei samlar på lastebilar, eller rettare sagt videofilmar og bilete av lastebilar.
Med mobiltelefonane klare stiller dei seg opp i vegkanten og håpar at ein skikkeleg tøff lastebil skal koma køyrande. Gutane er ikkje ute etter kva som helst. Bussar, traktorar og brannbilar interesserer dei ikkje. Heller ikkje alle lastebilar er stilige nok til at gutane gidd filma dei. Det må helst vera lastebilar som har fronten full av lys, horn, figurar og annan pynt.
Å samla på videofilmar og fotografi av lastebilar er ikkje ein hobby for den utolmodige. Det kan gå lang tid mellom kvar gong ein stilig lastebil køyrer forbi.
– Ein gong venta eg i 3,5 timar før det kom ein lastebil som var fin nok til at eg ville filma den, fortel Sander.
Sander og Oliver filmar lastebilar heile året, men er mest aktive i sommarhalvåret.
– Det kan vera keisamt å stå og venta på lastebilar om vinteren når det er mørkt og dårleg sikt, fortel Oliver.
Fleire av dei lokale sjåførane kjenner godt til gutane og hobbyen deira. Det er ikkje uvanleg at sjåførane sender ei lita helsing i form av tuting med horna eller blinking med lysa når dei passerer.
– Det er veldig kjekt når dei helser til oss på den måten, seier Oliver.
Det hender òg at gutane vert inviterte inn i førarhusa.
– Dersom me spør om me kan få sjå i førarhuset, får me ofte det. I alle fall så lenge dei ikkje har det altfor rotete, fortel Sander.
Oliver har samla lastebilfilmar lengst. Han har halde på i om lag tre år.
– Eg har sikkert film av fleire enn to tusen lastebilar, fortel han.
Sander heiv seg på hobbyen litt seinare.
Dei beste lastebilfilmane deler Sander og Oliver med andre lastebilinteresserte via TikTok.
– Det er mange både i Noreg og utlandet som samlar på opptak av lastebilar, fortel Sander.
