Frå leik til alvor på 1-2-3

– Skogbrann er veldig farleg. Det går så fort. Om det er tørt og litt vind, fyk glørne med vinden.

Publisert 03.06.2023 - 16:30

Det seier Hildegunn Berge.

Som brannkonstabel er ho alltid klar til å rykkja ut. Når alarmen går, har ho fire minutt på å koma seg til stasjonen. Innan eitt minutt skal ho vera klar i bilen med brannkleda på.

Annonse

Det krev øving. Og sidan ein brannkonstabel rykkjer ut til mykje forskjellig, må det øvast på mykje forskjellig. Éin dag er det ei bilulukke. Ein annan dag sit ei ugle fast i ei pipe. Og kanskje vil det ta fyr i skogen ein dag?

I mai øvde Hildegunn og resten av mannskapet i Kvam brann og redning på å sløkkja skogbrann. I Tørvikbygd tente dei på ein skog med vilje. Då fekk brannkonstablane øvt seg på korleis dei skal sløkkja og kontrollera ein slik brann.

Sjå film frå brannen her:

Lagar branngater

Annonse

I skogen tek det lett fyr. Ein skogbrann kan gjera stor skade på veldig kort tid, fortel Hildegunn. I nokre tilfelle er det faktisk nok at sola varmar opp eit glasskår eller forstørringsglas som ligg ute i naturen. Eller kanskje eit lyn slår ned. Men oftast er det nokon som er uforsiktig. Det kan vera bålbrenning som går gale, leik med fyrstikker eller sigarettsneipar som vert kasta i naturen.

Dette biletet vart teke under brannøvinga på i mai.

– Korleis øver de på skogbrann?

– Me øver på kva me skal gjera for å hindra brannen i å gå vidare. Brannen spreier seg så fort at det ikkje hjelper å springa etter. Me må møta brannen der han kjem og stoppa han, seier Hildegunn.

Brannkonstablane øver dessutan på å snakka saman på ein måte som gjer at alle forstår kva dei skal gjera, og på å samarbeida.

– Korleis stoppar de brannen?

– Ein av tinga me kan gjera, er å laga noko som heiter branngate. Det vil seia at me lagar ei slags gate der brannen kjem til å stoppa litt opp av seg sjølv, seier Hildegunn.

Annonse

Ordforklaring:

Ei branngate kan til dømes lagast med motbrann. Det vil seia at brannvesenet brenner ein del av skogen kontrollert. Då vil ikkje brannen ha meir å setja fyr på når han kjem til gata. Elles kan brannkonstablane dynka eit større område med vatn eller grava ei grøft. Ei grøft vil få opp fuktig jord som kan hjelpa til med å stoppa brannen.

Kjelde: Kvam brann og redning

I fjor var det 1.275 brannar i inn- og utmark i Noreg. 89 av dei oppstod i Vestland fylke. Biletet er frå øvinga i mai.

– Be om hjelp

Til og med brannkonstablar har klump i magen når dei tenner på noko på skikkeleg, fortel Hildegunn. Men øvinga var godt planlagd og trygg.

Eit brannhelikopter var med på øvinga. Helikopteret henta vatn som brannkonstablane hadde gjort klart i ein slags stor pose. Vatnet vart sleppt over brannen. Det er til stor hjelp i ein skogbrann. Noko av det fyrste brannkonstablane tenkjer på når det er skogbrann, er om dei skal be om hjelp frå eit helikopter.

Både helikopter, firhjulingar og droner var med på skogbrannøvinga.

Om det har vore sol og fint vêr lenge, er det ekstra farleg. Om det er vind i tillegg, kan brannen spreia seg til store område på få sekund.

– Kva gjer eg om det tek fyr på bakken?

– Om det er veldig lite som brenn, kan du trakka på det. Eller du kan leggja noko over som ikkje kan brenna. Det viktigaste er å be om hjelp, seier Hildegunn.