– Eg elskar dyr

Hanne er veterinær, eller dyrlege, på Kvam Veterinærkontor i Kvam. Der arbeider ho med allslags dyr, bortsett frå krypdyr eller reptil som til dømes slangar. Mest går det i hundar og kattar.

– Kvifor kjem folk med dyr til deg?

– Mange kjem fordi dyra er sjuke eller treng hjelp. Folk har heldigvis vorte flinkare til å førebyggja, slik at dyra held seg friske. Vaksinasjon er viktig, for hundar og kattar kan få ein del sjukdomar som me ikkje kan behandla.

– Kvifor vart du veterinær?

– Eg har visst sidan eg var lita at eg skulle verta det. Eg elskar dyr!

– Korleis er kvardagen din på jobb?

– Veldig variert. Alle dagar er ulike, og alle dagar er gjevande. Eg får treffa mange og får lov til å hjelpa våre firbeinte vener. Eg gler meg til å gå på jobb kvar dag. Nokre dagar er korte, andre lange, og nokre dagar er kjekke, andre tunge.

– Kva kan vera ein tung dag?

– Eg må av og til avliva dyr. Det er ei ære å få oppleva så mykje kjærleik på ein så tung dag. Det er viktig at familien får gje bestevenen eit verdig farvel og at dei får ei god avslutning. Dei fleste familiane er med på avlivinga, men ikkje på alt. Det snakkar me litt om på førehand. Fyrst sovnar dyret inn, før det får ei sprøyte som stoppar hjarta.

– Vert du òg lei deg då?

– Ja, eg har ikkje mange avlivingar på éin dag. Det er noko av det tyngste eg gjer i jobben, men også noko av det viktigaste. Det er fint å vita at dyret ikkje har det vondt lenger.

– Kva skjer med kroppane til dei døde dyra?

– Eigarane kan ta dei med heim og gravleggja dei eller senda dei til kremering i Bergen.

– Det spesielle med å ha eit kjæledyr er at du veit at du truleg mistar det ein dag?

– Ja, men eg ville aldri ha vore det forutan. Livet er best med dyr! Ingen kan førestilla seg kjærleiken før ein har opplevd han. Dyra er med deg kvar einaste dag. Og anten du har vore vekk i fem minutt, fem timar eller fem dagar, er dei like blide!

– Kva betyr det å kastrera dyr?

– Det er å fjerna organa som gjer at dei kan få ungar. Me gjer det mest på kattar, for å hindra at dei får altfor mange ungar og for at dei skal kunna gå fritt ute. Det er viktig for at dei skal ha det bra. Utan kastrering vert det altfor mange lauskattar som skadar kvarandre. Når katten er kastrert, vert han gjerne rolegare og meir heimekjær, og så har han lettare for å leggja på seg.

– Kva gjer eg om eg har ein hund som er litt bøllete?

– Ta kontakt med Kvam Hundeklubb. Alle kvalpar bør gå på kvalpekurs – ikkje berre for at kvalpen skal læra noko, men for at du skal læra å trena hunden til å verta slik du ynskjer.

– Korleis tek ein best vare på kjæledyr?

– Det viktigaste er å setja seg inn i kva for dyr du har og kva det treng. Dyra har ulike behov. Noko er likt, og andre behov varierer frå rase til rase. Nokre er nattdyr, andre dagdyr, nokre skal vera mykje ute, andre bør ha ei stabil innhegning. Om det er ein hund, må du setja deg inn i kva rase det er for å gje han det han treng av aktivitet, stell og fôr. Kattar likar ikkje endringar, så stabilitet er viktig. Set deg inn i korleis din katt vil ha det, fylg med på helsa og ta ein årleg helsesjekk hjå dyrlegen. Dyrebutikken har gode råd.

– Har du gode tips til born som vil overbevisa foreldra om at dei bør få eit kjæledyr?

– Du må forklara kvifor du vil ha dyret og kva det skal gjera for din kvardag, og så må du setja deg godt inn i dyret og kva det vil krevja av deg. Om du og heile familien er einige om at dyret vil vera bra for dykk, ville eg ha snakka med nokon som har eit slikt dyr og høyra om dei er samde. Og så er det lurt å prøva. Om du har ein ven som har eit slikt kjæledyr, kan du spørja om du får lov til å passa det. Du veit ikkje kva du får før du har fått dyret.