Direktør med drive: – Det er ein eigen livsstil

– Eg ynskte å verta ein del av samfunnet og vera tilgjengeleg, forklarar ho.

Etter mange år med farting flytta kvinna frå Fana til Norheimsund i 2019. Der har ho funne roa saman med sambuar Børge Meyer Hovland og dei tre norske skogkattane Mikkel, Gasolin og Neverwoods Thundermare – også kalla Lucy.

«Finndronninga»

Borge har mange jarn i elden på heimefronten og på jobb, og prøver å finna balansen mellom travle dagar på hotellet og diverse prosjekt i heimen. På lang sikt er det mykje som skal gjerast med både uteområdet og huset, fortel ho.

Paret er kome godt i gang med oppussing av huset, som vart bygt i 1942. Ifylgje Borge har det ikkje vore gjort noko med det sidan 1973. Enkelte stader kan ein sjå mønstrete, fargerike tapet som røper når rommet sist var oppgradert.

Bergensaren sit godt plassert i ein lilla sofa. Den raudblå fargen går att i mykje av interiøret i heimen. Mange av gjenstandane i romma, inkludert sofaen ho sit i, er kjøpte på nettstaden finn.no.

– Eg er dronninga av Finn, seier Borge og ler.

Ho syner fram kjøkenet, som nærmar seg å vera ferdig vølt. Kjøkenskap, hyller, komfyr og kaffimaskin er berre nokre av dei mange Finn-kuppa som er gjorde. Det er fleire årsaker til at ho er ein flittig brukar av nettsida som mange nyttar til kjøp og sal av gjenstandar.

– Eg likar tanken på gjenbruk, og synest det er fint at noko kan koma til nytte for fleire, fortel bergensaren.

I tillegg tykkjer ho at nettstaden er fin å ty til dersom ho har bestemte tankar om noko ho ynskjer seg. Medan noko er lett å skaffa, tek anna lang tid. Nokre av søka ho har lagt inn på sida, har lege der i over eitt år, forklarar Borge.

Stor motorinteresse

Utanfor huset står ein Asia Rocsta med kalesje. Bilen, som lenge har stått på ynskelista, fekk ho på plass i tunet i sommar.

Draumesykkelen, ein Harley, har ho òg. Motorsykkelinteressa byrja å spira då Borge var kring 17 år gamal. Ho minnest ein dag då ho og ei veninne gjekk langs vegen og såg ein mann på motorsykkel.

– Eg hugsar at me båe snudde oss. «Såg du han?» sa veninna mi, og snakka om føraren. «Ja, men såg du den?» sa eg, og var meir oppteken av sykkelen.

I eit yrke som krev mykje tid og energi, får ho ikkje nytta motorsykkelen så mykje som ho ynskjer. Mellom anna var fjoråret så travelt at ho ikkje fekk starta han ein einaste gong.

På farten

Som 16-åring tok ho sine fyrste steg inn i hotellbransjen. Sjølv om yrket i periodar kan vera svært krevjande, har ho ingen planar om å forlata det.

– Det er ein eigen livsstil, understrekar Borge.

Det heile byrja då ho var på Voss, der ho studerte teikning. I samband med Operasjon Dagsverk søkte ho og ei veninne jobb på Park Hotel Vossevangen. Båe enda opp som garderobevakter på nattklubben Pentagon, der Borge heldt fram med å arbeida i nokre månader.

Etter eitt år på Voss flytta Borge attende til heimbyen, der ho fullførte gymnastida. Ho visste ikkje kva retning ho ville ta etter dette, og kjende på trongen for å flytta på seg.

Bergensaren enda mellom anna opp med å jobba ein sesong på Gran Canaria.

– Det har vore ein del «flaksing». Besteveninna mi seier at eg har taterblod i årene, fortel Borge.

Møtte veggen

Heime i Noreg har ho vore tilsett på fleire hotell i ulike delar av landet. På eit av dei vart opphaldet kort. Ho vart vitne til at ein hotellgjest døydde medan ho stod og snakka med han. Episoden gjekk inn på henne.

– Det sette seg liksom i kroppen, seier ho.

I 2012 var ho med på å opna Myrkdalen Hotel. Som ein av få tilsette med hotellkompetanse fekk ho fort hendene fulle.

– Då eg kom inn døra, høyrde eg: «Tanja, Tanja, kan du nett sjå her? Kan du hjelpa meg med dette?» fortel Borge.

Arbeidskvardagen var i travlaste laget. Det fyrste halvåret trur bergensaren at ho jobba meir enn 600 timar overtid.

– Eg jobba heile døgeret. Eg måtte vera overalt. Til slutt small det, fortel ho.

Kroppen sende klare signal om at grensa var nådd, og Borge opplevde både hovudpine, tunnelsyn og nedgang i vekt. Ifylgje henne var det ikkje berre ho sjølv som kjente på den store belastinga. Ein etter ein møtte fleire i leiargruppa veggen, fortel ho. Manglande hotellkompetanse var truleg ei av årsakene til at presset vart så stor, meiner Borge.

Det heile enda med ei sjukmelding. Energilageret var tomt. Kreftene var vekke.

– «No forlèt eg bransjen!» hugsar eg at eg tenkte, fortel Borge.

«Den eine»

Legen hennar oppmoda henne om å ta nokre veker ferie i varmare strøk, og Borge reiste til Gran Canaria saman med ei veninne.

Medan ho var på øya, fekk ho ein uventa veneførespurnad på Facebook frå Børge Meyer Hovland, som ho hadde møtt i jobbsamanheng ei tid tilbake.

– Då hadde eg ikkje så mange tankar om han, anna enn at han var ein triveleg kar, fortel Borge.

På den spanske øya vart førespurnaden godkjend. Då ho var attende i Bergen, tok Hovland henne med på jolekonsert med Sissel Kyrkjebø.

– «Han er ein sånn som inviterer, han», hugsar eg at eg tenkte.

Store delar av livet har ho vore van med å ha ein «bestekompis», fortel ho. No trudde Borge at ho var på veg til å få seg ein ny. Men det skule visa seg å vera meir enn det. I ein alder av 38 år møtte ho «the one», fortel ho.

Borge og Hovland fann tidleg ut at dei delte den same forkjærleiken for bilar. Nøyaktig kor mange bilar dei har, både som prosjekt og i bruk, er ho ikkje heilt sikker på.

Medan Borge har to Asia Rocsta med ulike taktypar, ein Ford Fiesta XR2i 89-modell og ein nyare Mercedes, har Hovland ein del fleire i samlinga si. Dei fleste av dei, mellom anna ein gamal Triumph som morfaren kjøpte ny i 1965, har han ståande i ein garasje i Bergen, fortel bergensaren.

Vegen attende

Etter nokre år som sjukmeld sa Borge til slutt opp stillinga i Myrkdalen. Sjølv om det var ei tøff avgjerd, letta oppseiinga på mange måtar ei tung bør, fortel ho.

Ho byrja å søkja på andre typar jobbar, og bad ein tidlegare hotelldirektør i Myrkdalen om å vera referanse. Av henne fekk ho jobbtilbod på eit hotell i Telemark. Ho var usikker på om ho skulle attende i jobben ho hadde vorte utbrend i, men valde likevel å takka ja. Det gjekk berre nokre månader før det på ny sa stopp.

– Eg var redd det var for tidleg, og det var det.

Borge har alltid ynskt å bu ved sjøen, og sambuaren er veldig glad i Hardanger. I 2014 enda paret opp med å kjøpa ei hytte i Fresvik i Ullensvang.

I ein periode var Ullensvang ikkje berre eit ferieområde, men også ein arbeidsstad for Borge. Ho tok mellom anna del i eit prosjekt som gjekk ut på å gjera asylmottaket i Kinsarvik om til ein vandrarheim og opplæringsstad for dei som hadde hamna utanfor arbeidslivet. Målet var å leggja til rette for at folk skulle læra seg å arbeida i reiselivet, slik at dei kunne vera ein ressurs for bransjen.

Prosjektet presenterte Borge på ein konferanse i Kinsarvik. Der vart ho kjend med Tina Våtvik Olsen, driftsdirektør i Fjordtind Hotels AS, som var på jakt etter ein hotelldirektør til Hardangerfjord Hotel i Øystese.

Borge enda opp med å kontakta Olsen – ikkje for sjølv å søkja på jobben, men for å hjelpa til med å finna ein aktuell kandidat. Men driftsdirektøren ville det annleis. Ho ville ha Borge inn i stillinga.

– Me er ein familie

Trass fleire tøffe tak hadde ikkje Borge fått nok av bransjen som var vorten ein stor del av livet hennar. I mai 2019 signerte bergensaren avtalen om å verta hotellsjef. Kort tid etter kjøpte Borge og Hovland hus i Norheimsund.

Sjølv om Borge fleire gonger har vurdert andre jobbar, har ho aldri klara å sleppa taket på yrket.

– Du vert på ein måte eit hotellmenneske. Det er noko med heilskapen, seier Borge.

For henne betyr det mykje å få moglegheita til å byggja andre opp, og å hjelpa dei med å finna sin plass. Å skapa ein god kultur blant dei tilsette er viktig for henne. Hotelldirektøren er full av lovord om teamet, som ho omtalar som familie.

Alle erfaringane hennar vonar ho er med på å gjera henne til ein betre leiar. Borge er spesielt oppteken av å vareta dei tilsette.

– Eg vil heller at alle skal jobba 100 prosent og levera 100 prosent enn at nokon skal jobba 200 prosent og levera 50. Helse og balanse mellom jobb, familie og vener er viktig, understrekar ho.