Bur på fjellet
Isa Huse Nyland (5) har vore hyttevert på Breidablik i sommar.
Isa har vore på Breidablik kvart år sidan ho vart fødd. Det er favorittplassen hennar på fjellet. I år var tredje gongen ho gjekk den lange turen opp dit på eigne bein.
Isa og mora, Sissel Huse, var i sommar hyttevertar på Breidablik i ei veke. På Breidablik ligg ei hytte som alle kan få koma inn i og sova i.
– Har du vore hyttevert før?
– Nei, dette er fyrste gongen.
– Kva er oppgåvene dine?
– Eg tek imot folk og viser kvar dei skal sova.
– Kvifor ville du vera hyttevert?
– Fordi det såg kjekt ut.
Isa synest dei nye hyttene på Breidablik er veldig fine. Før dei vart bygde, stod den gamle hytta, «Karistova», aleine. Det hugsar ikkje Isa, men ho har sett bilete frå den tida. Ho elskar å vera i naturen, likar å klatra og har ikkje høgdeskrekk.
– Eg synest det er kjekt å bu på fjellet!
– Kva gjer du her oppe?
– Spelar yatzy og kortspel, og leikar med Barbie og båten min.
Båten har ho laga sjølv av plankar, spikar, pussepapir og teiknestiftar. Han ligg trygt inntil ein liten kai ved tjørna – eit lite vatn – utanfor hytta.
– Korleis har vêret vore denne veka?
– Det har regna mykje.
– Kva tykkjer du om det?
– Det går bra, for det er fint å vera inne òg. Når det pøsregnar, tenkjer eg ikkje så mykje på båten min.
Isa har med eigen tursekk til Breidablik. I sekken har ho pakka regnbukse, bamse, barbiedokke og matpakke.
– Kva plar du eta på tur?
– Rundstykke og sjokolade.
Den veka Isa var hyttevert, bada Isa i tjørna i hyttetunet.
– Det var kaldt!
Les også:
