Formann Ole Johannes Bakke i Bir avdeling Norheimsund gruar seg sjeldan tilå reisa på jobb. – Det er kjekt å vera utandørs, spesielt når det er sol. Kundane er stort sett trivelege og blide, seier han.

– Å jobba med farleg avfall er det aller kjekkaste

Ole Johannes Bakke jobbar på gjenvinningsstasjonen til Bir i Norheimsund. Du har kanskje sett han eller kollegaene hans i oransje jakker om du har vore innom. Men kva gjer dei eigentleg?

Mari Ulvund
Journalist
Publisert

Medan dei andre er kunderettleiarar, er Ole Johannes formann. Det vil seia at han har litt meir ansvar for at alt går som det skal. Alle i Bir er opptekne av at boset som folk leverer inn, skal sorterast rett.

Ole Johannes har jobba med gjenvinning i 12 år. Han fortel at noko av det viktigaste med jobben er å informera og å hjelpa folk med sortering.

– Me svarar på det me kan. Viss me ikkje veit svaret, gjer me det me kan for å prøva å finna ut av det, fortel Ole Johannes.

Ofte kastar folk ting i restavfall som ikkje skal vera der. Då må Ole Johannes bruka «fiskestonga» for å få det ut av konteinaren.

Må rydda i boset

Ingen dagar er like. Kvar dag kjem det nye kundar som kastar søppel. Folk kastar mykje rart, fortel han.

– Kva er det raraste du har sett?

– Nokon har kasta hageslangar og -møblar i hageavfallet. Hage er jo hage, tenkjer nokon, seier Ole Johannes.

Han forklarar at det berre er det som naturen kan bryta ned sjølv, som til dømes ugras, lauv og plantar, som er hageavfall.

– Og ein gong var det nokon som heiv restane av ein hjort i restavfallet! Det skulle ha vore kasta i skogen, slik at rovdyr hadde fått tak i det. Det er naturen si eiga resirkulering, seier Ole Johannes.

Av og til sit han på kontoret. Då svarar han på e-post, sit i telefonen eller gjer papirarbeid. Det er ikkje det kjekkaste han gjer, seier han.

På gjenvinningsstasjonen leverer kundar inn bildekk med og utan felgar. Visste du at underlaget til mange idrettsbaner og leikeplassar er laga av bitar av dekka?

Vern er viktig

Ole Johannes likar aller best å sortera farleg avfall. Det er avfall som inneheld stoff som er farlege for helsa og miljøet. Han kontrollerer alt som vert levert inn, og passar på at det hamnar i rett boks.

– Det er grådig gøy! «Hmm, kva er dette? Kvar høyrer det heime?» tenkjer eg med ofte meg sjølv, fortel han.

Når han arbeider med farleg avfall, må han vera godt beskytta. Då tek han på seg visir og spesielle hanskar. Ole Johannes er svært oppteken av tryggleik. Alle tilsette øver jamleg på fyrstehjelp. Dei tek ulike kurs som skal gjera det tryggast mogleg å vera på jobb. Og så er det viktig at alle brukar verneutstyr, seier han.

Folk set frå seg mykje rart av farleg avfall. Noko av det som kjem inn, er veldig gamalt, som til dømes denne flaska.

– Kva synest du om kundane?

– Folk har vorte mykje flinkare til å sortera, spesielt farleg avfall, batteri og elektrisk avfall. Det er veldig bra! seier Ole Johannes.

forureining norheimsund natur og miljø bygdalangs bir as
Laga med Labrador CMS