Vil byggja flytebryggje på Botnen

Flatabø Grunneigarlag har søkt Kvam herad om dispensasjon frå arealdelen til kommuneplanen på gard nummer 64/1, 64/10 og 64/11 på Botnen for å utbetra og fornya ei flytebryggje.

Laget ynskjer dispensasjon frå byggjeforbodet i eit område for landbruk, natur og friluftsliv, byggjegrensa mot sjøen, krav til bryggjer, bruk og vern av vassdrag med tilhøyrande strandsoner og omsynssoner med viktige område for friluftsliv, landskap og kulturminne.

Føremålet er å utbetra eksisterande flytebryggjeanlegg og etablera ein kai med køyrefast dekke fram til ein kort landgang som skal gå ut på ei ny flytebryggje.

– Eksisterande bryggjeanlegg er i dårleg forfatning, har for liten kapasitet til å stetta behovet til brukarane og har fleire faremoment som i sum fører til at brukarane er samde om å utbetra anlegget, skriv laget.

Eigedomen er den einaste tilgangen dei nemnde bruka har til sjøen, med til saman ti meter strandsone. Slik anlegget er i dag, er det ikkje tilstrekkeleg kapasitet til båtfortøying for husstandane som er tilknytte bruka. Mellom desse er det både næringsdrivande og fastbuande, i tillegg til dei som nyttar gardsbruka som fritidsbustad.

Tiltaket vil ikkje hindra tilgang for ålmenta til strandsona, men heller bidra til betre tilgang for friluftsliv både på land og til sjøs, skriv Roger Botnen på vegner av søkjaren.

Det er ikkje registrert kulturminne på eigedomen.