Varslar bygging på brakklagd tomt

Mariann Lilledal Valland har, på vegner av Einarhaug Vel, teke opp saka i eit brev til Fylkesmannen.

— Eigarane skulle fullføra ein firemannsbustad i 2019. No er byggjeløyvet gått ut. Ingenting skjer, skriv ho.

Valland tykkjer det er trist at det skal sjå slik ut. Området er farleg for born, med dei høge grunnmurane som står der. Ho spør om ikkje eigarane har ei plikt til å ferdigstilla husa. Valland har snakka med heradet, dei som eig tomtene, og arkitekten, fortalde ho til HF før jul.

Då håpa ho på snarleg framdrift i utbygginga på tomta.

Det skal òg koma eit fellesområde. Det er bebuarane på Einarhaug interesserte i. Ein får ikkje gatelys før tomtene er utbygde. Naboane er dessutan ikkje interessert i at det skal byggjast for tett, ifylgje Valland.

— Inkje teikn om plan

Arkitekt Terje Lamo i Sagvåg på Stord opplyste til HF før jul at reguleringsplanen for Einarhaug truleg ville verta ferdig før høgtida. Lamo har på grunn av sjukdom bruka fleire år på å teikna prosjektet, fortel han.

Når reguleringsplanen er levert, vil det gå ei tid med sakshandsaming, seier Lamo.

Plan- og byggjesakssjef i Kvam herad, Heidi E. Ørjansen, opplyser at det har vore skipa til oppstartsmøte med utbyggjar og eit planfirma.

— Det har vore kunngjort oppstart, men me har ikkje fått nokon reguleringsplan, og heller inga antyding til at det er nokon plan på veg. Det har me kravd før dei får lov å gjera noko meir, sa Ørjansen til HF før jul.

— Har vore ei mare

Øyvind Storli, som held til i Drammen, og Torbjørn Brun på Reksteren i Tysnes, eig tomta gjennom Brun og Storli Eiendom AS.

— Det står ikkje på oss. Me har purra på reguleringsplanen heile tida, seier Storli.

I reguleringsplanen er det lagt inn to seksmannsbustader med garasje under den eine, og to firemannsbustader.

— Dei kjem til å verta veldig fine, seier Storli.

I tillegg er det ei råtomt der utbyggjarane ikkje har bestemt seg for kva dei skal gjera. Dei vil anten utvikla henne eller selja. Brun og Storli søkjer om å få ein firemannsbustad der òg.

— For oss har det eigentleg vore ei mare å ikkje koma i gang. Me skulle ynskja det var ferdig for lenge sidan, seier Storli.

— Vert moderne hus

Storli overtok prosjektet hausten 2010, fyrst sjølv, og så kom Torbjørn Brun inn i 2011. Då oppretta dei Brun og Storli Eiendom. Dei hadde sett føre seg å få bygt i løpet av eit par — tre år.

Det vert hus av dagens standard, lovar Storli.

Dei to håpar på å selja etter kvart som dei byggjer. Ein firemannsbustad vert den fyrste dei byggjer, og så skal dei byggja to seksmannsbustader etter kvart som dei greier å selja dei, fortel Storli.

Enno er ingen reguleringsplan motteken av Kvam herad.

Ørjansen opplyser at siste aktivitet i saka var i 2018. Heradet hadde kontakt med Lamo i august 2020 og fekk informasjon om at Lamo hadde inngått eit samarbeid med eit firma på Stord for å utarbeida reguleringsplanen.

— Etter dette har me ikkje hatt kommunikasjon med arkitekten, fortel Ørjansen.

HF har ikkje lukkast med å få kontakt med arkitekt Lamo denne veka.