Usmak på vatn på skogen

Hytteeigar i Åreiane på Kvamskogen, Cato Iversen, meiner vatnet i området smaka «myr» i pinsen.

Han hadde vatn med seg, men lurer på om fleire har klaga på smaken på vatnet.

— Er dette på grunn av at det har vore lite besøk på hyttene i vinter? skriv han i eit brev til Kvam herad.

Heradet svarar at det ikkje har kome andre klagar på vatnet i området, men at det med jamne mellomrom kjem meldingar om slike problemstillingar frå ulike område på skogen.

— Dette kan skuldast at vatnet har stått lenge i leidningen eller at han er dårleg reingjord, skriv vass- og avløpsingeniør Jarle Ystebø til Iversen.

Reingjering og utspyling av det private nettet er det eigarane som har ansvar for. Det kommunale nettet på Kvamskogen vert spylt eller pluggkøyrt om lag ein gong i året.

— Det er sjølvsagt mogleg at det kan førekoma feil med vasskvaliteten på det kommunale nettet, men me tek jamleg prøvar og følgjer med på slike tilbakemeldingar frå brukarane, skriv Ystebø, som ber Iversen ta kontakt om vatnet ikkje skulle betra seg.