– Sats på Herand!
Særleg éin ting manglar i Herand, ifylgje bygdelaget: bustadtomter.
Det kjem fram i eit innspel til samfunnsdelen i den nye kommuneplanen.
Herand Bygdelag skriv at det å leggja til rette for bustadbygging er viktig for å halda oppe dei mindre lokalsamfunna i Ullensvang kommune og få unge til å venda heim etter utdanning.
Tomter er òg viktig for å få personar utan lokal tilknyting til å busetja seg, meiner laget.
Det er kort veg frå Odda til tomteland i tidlegare Jondal kommune som ikkje er ras- eller flaumutsett. Dei kommunale bustadfelta må utviklast vidare, ifølgje laget.
Utvidinga av Tveitehagen bustadfelt i Herand må prioriterast og setjast i gang snarast. Kommunen kan òg medverka til fortetta bustadbygging, meiner bygdelaget.
HB ynskjer òg at kommunen legg til rette for etablering av små, fortetta hyttefelt i fjellet.
– Dette kan bidra til lokal aktivitet og tilflytting, skriv Vassel.
For å halda oppe busetnaden, er det viktig at det vert lagt godt til rette for verksemder, landbruk, fruktdyrking og anna næring. Nokre område i planen bør setjast av til industriområde, meiner laget, som stiller seg positiv til utbygging av oppdrettsverksemder.
Planen må sikra at folk kan bu, arbeida og trivast i heile kommunen. Kommunen må stimulera lokalt lagsliv så folk kan ha ei aktiv og meiningsfull fritid. Tilgang på fritidsaktivitetar sikrar god folkehelse i alle aldrar, meiner bygdelaget.
Laget ber kommunen om å arbeida for eit utvida busstilbod som korresponderer med ferjene. Fylkesveg 550 mellom Herand og Utne er i store delar svært smal, med mange skarpe svingar og dårleg framkome, spesielt for større køyretøy. HB ynskjer at standarden på vegstrekkja vert heva.
Elles vonar laget at mobildekninga i Herand vert betre og at fiberutbygginga vert fullført.
