Restaurerer stølshus

Fyrst og fremst legg dei eit nytt helletak med villheller, og restaurerer ei halvtekkje, ein vedaskut.

– Den hadde ikkje vore gjort noko med på over hundre år, seier Borge.

Dugnadsgjengen har så langt brukt over 250 timar, og vil truleg leggja ned 400–500 timar til saman. Selet har 16–17 grunneigarar.

Finnheller ligg om lag fem kilometer nordvest for Tørvikbygd, like ved drikkevasskjelda Finnhellersvatnet og sør for Krokavatnet. Ein gard på Drage hadde sommarstøl på Finnhiller fram til 1915. Då vart stølen felleseige.

Får tilskot

Sverre Brattli er formann i grunneigarlaget. Han har søkt om tilskot til spesielle miljøtiltak i landbruket (SMIL) til tiltaket, og fått tilsegn om 37.000 kroner. Det skal dekkja mellom anna helikoptertransport. Materialar til ny kledning, helletroer, materialar til skuten, ved og verktøy frakta ein opp med tre helikopterhiv.

– Det går lang tid når ein skal leggja villheller, seier Borge.

Ein del heller er øydelagde eller ikkje brukande, og då må dugnadsfolka finna nye i steinurene.

Inne i selet skal dei lakkera golvet. Det har ikkje vore gjort på femti år.

Interessa varierer litt, seier arbeidsleiaren. Nokre få eldsjeler tek vare på huset. Andre tek ikkje eingong vare på stølshuset dei har lenger nede, seier han.

Turvande vedlikehald

– Kvifor gjer de dette?

– Viss ein ikkje gjer det – det var byrja med lekkasje på taket –, så forfell det og vert ikkje brukande til noko meir. I desse dagar, når ein har dagsturhytter for seg, er ein gjerne innom når ein går dagstur eller ser etter sauer. Det er ofte slik ein brukar huset, seier Borge.

Borge er bonde og har utført mykje vedlikehald av bygningar. Han veit ikkje om det finst utdanning for å leggja villheller.

– Det er meir kunstverk enn handverk, seier han.

Byggmeister Terje Kolltveit har vore oppom og hjelpt til.

Dei som hjelper til no, er grunneigarar og medeigarar i selet, opplyser Borge.