– Plaga med dårleg lukt i 39 år
Geir Johnson har sidan 1982 vore plaga med vond lukt frå ein kommunal slamavskiljar på eigedomen i Jondal.
Anlegget skulle byggjast plant med bakken, opplyste kommunen om då Johnson sa ja til ein avtale.
– Denne lovnaden vart ikkje halden, og anlegget, ein betongkloss, er plassert om lag ein meter oppe i dagen, på eit av dei finaste områda på eigedomen vår, skreiv Johnson i eit straumbrev til Ullensvang kommune 17. august i fjor.
I avtalen står det at Jondal kommune går god for at det ikkje skal oppstå lukt knytt til drifta av anlegget. Skulle det likevel oppstå lukt, skulle kommunen gjera strakstiltak for å ordna dette, skreiv Johnson til Ullensvang kommune 4. august i år.
Frå den dagen anlegget vart etablert, har det periodevis gjeve frå seg dårleg lukt, til plage for bebuarane. Lukta har øydelagt dei fleste fine dagane i hagen for dei. Dette er jamleg teke opp i brev til Jondal kommune, og kommunen har etter beste evne utført små tiltak i håp om at dette skulle betra seg, utan å lukkast. I fjor vart det utført mykje arbeid på reinseanlegget, ifylgje Johnson.
– Fjern lukta!
– Me hadde då stor tru på at lukta skulle forsvinna. Det har ikkje skjedd, skriv Johnson.
Det har vore dialog mellom Ullensvang kommune, Geir Johnson og Cowi AS sidan i fjor sommar og haust.
Johnson sette fram krav om ein årleg kompensasjon. Den årlege erstatninga han har fått utbetalt, kan ikkje einast med dei ulempene han har fått på eigedomen, meiner Johnson.
Kommunen ser fram imot vidare dialog og vil i det lengste søkja å finna løysing på problemet med lukt frå anlegget, opplyser rådmannen i eit brev.
– Ingenting har hjelpt
Johnson er nøgd med engasjementet til teamet som har ansvar for saka. Men tolmodet frå grunneigaren er ikkje klart for nye år med modifisering av det eksisterande anlegget, då ein veit av erfaring at ingen ting har hjelpt til no.
– Me er tydelege: Bygg eit nytt anlegg ut frå dagens standard – flytt anlegget ut av sentrum dersom det lèt seg gjera –, alternativt bygg eit nytt anlegg på nabotomta til kommunen, skriv Johnson.
Rådmannen svarar Johnson at han vil gjennomføra dei tiltaka som kom fram av referatet frå ei synfaring saman med Cowi 15. juli.
Det har ikkje vore mogleg å fastslå kvar i anlegget lukta oppstår, opplyser Cowi i referatet.
Cowi orienterer om ulike tekniske forbetringar som er gjorde på anlegget. Verksemda lanserer òg tiltak for å eliminera luktproblemet. Mellom dei er tømming av slamavskiljaren to gonger i året i staden for éin. Eit anna er flytting av heile slamavskiljaren til den kommunale nabotomta.
