– Moderat interesse for bustader i Tørvikbygd

– Det er moderat interesse for bustader og ingen sal, opplyser dagleg leiar Håkon Hjartnes i H2 Hardanger AS til HF.

Bustadtomter i feltet som er under regulering, har vekt ei viss interesse, fortel han. Hjartnes vurderer å auka storleiken på bustadene.

Kor mange bustader som vert bygde, vil avhenga av salet av tomter i utbyggingsområdet. Tomtene ligg mellom barneskulen og barnehagen. Skulen vart i haust berga frå nedlegging, mellom anna av di det var tomter på gang i bygda.

Reguleringsplanarbeidet tek Geoplan AS i Norheimsund seg av på vegner av arbeidsfellesskapet Fuglafjell AS.

H2 Hardanger ynskjer å byggja både eine- og fleirmannsbustadar. Planområdet er på om lag 104 mål. Det er inngått ein samarbeidsavtale med grunneigar Per Steinar Berentsen.

Natur er ein viktig kvalitet ved feltet. H2 Hardanger vil i størst mogleg grad ta omsyn til både utsikt, solforhold og at det står att noko vegetasjon, for å laga eit godt bumiljø over lang tid. I beltet mellom bustadområdet og Tørvikvatnet vert det friluftsområde. Eksisterande jordbruksareal skal regulerast til landbruksområde.

– Etterspurnaden avgjer

Prosjektleiar Thomas Mælen seier at når ein lagar eit byggjefelt i eit område som Tørvikbygd, så ynskjer ein størst mogleg fleksibilitet i reguleringsplanen, noko som gjer det mogleg å tilpassa utbygginga til etterspurnaden i marknaden over tid.

Storleiken på bustadene vil variera med målgruppa, som ein vil gjera så brei som mogleg.

– Her vil det vonleg koma både etableringsbustadar, rekkjehus og einebustader, og etter kvart kanskje også seniorbustader, seier Mælen.

Det er vanskeleg å sjå for seg korleis behova til dei enkelte i målgruppa vil endra seg i løpet av ei utbyggingstid på kanskje tjue år. Dette er det etterspurnaden i lokalmarknaden som vil avgjera, fortel prosjektleiaren.

Vonar folk vil flytta hit

Det som er viktig for Fuglafjell, er, som i andre utviklingsprosjekt firmaet er involvert i, å vera lokalt fundamentert og bidra til lokal utvikling.

Feltet vil vera ein god stad å bu, spår Mælen. Det vil få trygg veg til både barnehage og skule. Skulen vart i haust berga frå nedleggingsspøkjelset, med mellom anna tomteutviklinga som politisk grunngjeving.

Mælen vonar folk vil vurdera å flytta til Tørvikbygd når dei ser at det er tilbod om gode tomter. Ein viktig føresetnad for at folk skal velja å busetja seg i utkantane er tilgjengelege tomter og prosjekt.

– Utan det veit me kva som skjer. Då vert det ikkje utvikling. Å skaffa tomter er heilt i tråd med vår tanke om å bidra til lokal utvikling, seier Mælen.

Den reelle etterspurnaden må vera stor nok til å dekkja utbyggingskostnadene.

Også verksemdene Kvammabygg AS, Tekno AS og GBS AS er del av Fuglafjell.

– Gruppa har dei fleste faga som skal til for å gjennomføra ein slik type utbygging, seier Mælen.