– Framleis god etterspurnad

Kjetil Aarsand, eigedomsmeklar i Nordvik Hardanger, fortel at etterspurnaden av primærbustadar var god i fjor. Flest einebustadar vart selde.

– Bustadmarknaden har vore bra. Det er god respons frå kjøparane. Mange er på ballen og tek kontakt med oss, fortel Aarsand.

God etterspurnad

Ifylgje eigedomsmeklaren var det stabil aktivitet i bustadmarknaden i fjor. Aarsand fortel at det har vore ein gradvis auke i sal av primærbustadar.

Talet på selde primærbustader i 2024 var 67. Medan det i 2023 vart selt 65 bustadar, var talet 57 i 2022. 47 av sala i 2024 galdt einebustadar.

Aarsand påpeikar at det har vore stor interesse for einebustadar i Øystese og Norheimsund. Bustadar som ligg i etablerte strøk og som er i god stand nok stand til at folk kan flytta rett inn i dei, tiltrekkjer mange.

Samtidig påpeikar eigedomsmeklaren at kjøparane har vorte meir villige til å pussa opp dei siste åra. Han trur at den høge renta er ein del av årsaka.

– Folk tek gjerne opp eit mindre lån og pussar opp gradvis, kontra å låna ein høgare sum til kjøp av eit nyare hus, fortel eigedomsmeklaren.

Unge bustadkjøpar i alderen 25–35 år er aktive kjøparar, fortel Aarsand. Han meiner det har ein samanheng med at folk flyttar heim att etter å ha utdanna seg, jobba og budd i andre delar av landet.

– Me ser at det er ein del som vil tilbake til Kvam, fortel Aarsand.

I Jondal har det vore stabile salstal dei siste åra. I 2024 vart det selt fem einebustadar. Aarsand fortel at bustadprisane i Jondal har fått seg eit løft dei siste åra, særleg prisane på bustadar nære sentrum.

Kamp om bustadar i sentrumsbygdene

Også eigedomsmeklar Sturla Nødtvedt i Eiendomsmegler Vest i Norheimsund seier at det framleis er stor interesse for bustadar i sentrumsbygdene. Han ser ein trend i bustadmarknaden.

– Det er stor interesse for bustadar som ligg i sentrumsområda i Øystese og Norheimsund. Særleg for dei bustadane som krev lite vedlikehald, fortel Nødtvedt.

Nødtvedt trur interessa for nyare bustadar skuldast den høge renta. Renta har medverka til at kjøparane ynskjer å ha større kontroll over kostnadar med vedlikehald, seier han.

Eigedomsmeklaren påpeikar at det manglar i sentrumsområda.

– Det er naudsynt å byggja fleire bustadar. Interessa blant kjøparane er stor, påpeikar Nødtvedt.

Kjetil Aarsand fortel også om høg etterspurnad etter bustadar i Øystese og Norheimsund.

Småbruk og sjøeigedomar er populære og etterspurde. Det er underskot på slike eigedomar i bustadmarknaden, fortel Aarsand.

Auke i omsetningstida

Omsetningstida – tida frå ein bustad vert lagd ut for sal til han vert seld – gjekk kraftig opp i 2024 samanlikna med i 2023. I 2023 tok det i snitt tok 20 dagar å få selt ein primærbustad. I fjor var omsetningstida 70 dagar.

– Det er store variasjonar i kor lang tid det tek før ein bustad vert seld. Nokre bustadar vert selde etter eit par veker. Andre kan vera til sals i fleire månadar. Det vert store utslag på statistikken, fortel Aarsand.

Han fortel at bustadar i sentrale strøk vert selde raskare enn bustadar i ytterkantane.

– Det er slik det plar vera, fortel han.

Nedgang i kvadratmeterpris

I 2023 var kvadratmeterprisen i snitt 23.000 kroner. I 2024 minka den til 19.400. Aarsand påpeikar at nedgangen ikkje nødvendigvis speglar bustadmarknaden elles.

– Kvadratmetrane spelar ikkje så stor rolle i bruktmarknaden. Det er ikkje nødvendigvis slik at kjøparen får dekt fleire behov dersom det er fleire kvadratmeter, forklarar Aarsand.

Fleire einebustadar vart selde for mindre enn prisantydinga i fjor, samanlikna med dei to siste åra. I 2024 vart 55 prosent av eigedomane selde under prisantyding, mot 39 prosent i 2023 og 42 prosent i 2022.

Snittprisen på einebustadar har auka frå 3,38 millionar til 3,555 millionar kroner.

– Spent på 2025

Aarsand trur at 2025 vil verta ganske likt som i fjor. Han trur at den høge etterspurnaden etter bustadar i Øystese og Norheimsund vil halda fram.

Han er spent på korleis endringa av eigenkapitalkravet i samband med bustadlån vil spela inn i marknaden. Frå 1. januar vart kravet senka frå 15 prosent til 10 prosent. Det vil bidra til at folk kan låna meir pengar, påpeikar han.

– Folk får moglegheita til å nytta meir pengar til bustadkjøp. Dette kan medverka til at bustadprisane går opp, seier Aarsand.