Førebyggjer brannspreiing på campingplass

HF, som ligg mellom Øystese og Norheimsund, har valt Hardanger Byggsenter AS til å føra opp pålagde brannvegger mellom nokre av vognene i caravanparken. Det trengst der vognene står tettare enn tre meter.

Det ser ut til å verta 18 brannvegger.

– Det vart litt færre enn me hadde trudd, seier Nes.

Prosjektet er ferdig planlagt. Innehavar Geirmund Nes ventar for augneblinken på at arkitekten, Geoplan AS, skal laga søknad til heradet slik at prosjektet vert byggjemeldt.

Nes og arkitekten har teikna veggene ferdige, og dei er godkjende av brannkonsulenten.

– Opphavleg var eg ikkje merksam på at det måtte byggjemelding til. Det fekk me vita i samband med det siste besøket me hadde av branntilsynet. Dette kom i tillegg. Det må ein sjølvsagt retta seg etter. Så har me sett i gang prosessen med å få det gjort, seier Nes.

Arbeidsstart til våren

Totalkostnaden er enno ukjend.

Nes reknar med svar frå teknisk etat i november–desember. Heradet har tre månaders handsamingstid, men det kan henda det går fortare. Medio mars vonar han å kunna starta med påling av søyler for brannveggene.

– Me hadde trudd me skulle starta bygginga i haust, men no er me komne langt ut på året. Me held på og tek båtane på land og førebu oss på vinteren, naturleg nok. Det kjem nokre slengjarar innom til oss enno, og litt trafikk har me. Me ser føre oss at viss det går ein månad før søknaden er levert, så vil det ikkje vera naturleg å byrja på arbeidet før til våren. I april–juni vil bygginga av sjølve veggene skje, fortel Nes.

Tryggare for gjestene

– Vert det ein tryggare stad å vera turist?

– Ja, det får me verkeleg håpa. Det er i alle fall meininga. No er det hyggjeleg å kunna seia at me ikkje har hatt noko branntilløp på campingplassen vår. Sånn sett er det vanskeleg å vurdera det på annan måte enn at desse krava som styresmaktene stiller, stiller dei av ein grunn. Dette knyter seg til sikkert både erfaring og statistikk på eit mykje større område. Det vil alltid vera grunnar for regelverket, seier Nes.

Den daglege leiaren er oppteken av at arbeidet kan skje på eit tidspunkt då HF ikkje har altfor mange gjester.

Dei fleste vognene står langt nok frå kvarandre til at dei ikkje treng brannvegger. Veggene er fyrst og fremst knytte til den delen av anlegget som vart bygd midt på 70-talet. Det er 60 vogner i alt på plassen, opplyser Nes.

Kvam brann- og redningsteneste skriv til Nes at tilbakemeldinga er tilfredsstillande. Prioritering og tidsplan for retting av påpeikte avvik og merknadar ligg innanfor ei akseptabel tidsramme.