Får setja opp brakkeinternat
Framnes Kristne Vidaregåande Skule har fått godkjent det nye mellombelse modulbygget som skal utvida kapasiteten på internatdelen for elevane.
Det mellombelse internatet er enno ikkje oppført, men byggjeløyve er gjeve av byggjesaksavdelinga i heradet. Rådmannen har dessutan godkjent bygget etter lov om folkehelsearbeid, forskrift om miljøretta helsevern i barnehagar og skular og delegeringsreglementet for Kvam herad.
Kjem om nokre veker
Med det har skulen fått alle løyve som trengst, og brakkene vert etter planen leverte 10. desember, seier rektor Harald Voster.
Dei skal monterast på eit fundament. Ventilasjon, vatn og avløp og det elektriske anlegget skal òg installerast. Det vert toalett og dusj på kvart rom. Hyblane er tenkt nytta i åtte—ti år, som skulen har fått godkjenning for. Bygget vil gje plass til 20 elevar, men ein kjem ikkje til å utvida kapasiteten på skulen elles.
— Det kjem til å vera den same elevmassen som i dag, men det vert litt betre plass, seier Voster.
Prisen på modulbygget vert mellom fire og fem millionar kroner.
Var på synfaring
Kommuneoverlege Dag Erlend Skjelbreid og ein representant for byggjesaksavdelinga i heradet har vore på synfaring på tomta for det nye bygget. Kommuneoverlegen har òg hatt møte med Voster og prosjekt- og byggjeleiar frå firmaet Novaform Bergen AS.
Fordi skulen planlegg å starta bygginga om kort tid, vart ikkje heile skulen inspisert. Ein fokuserte på godkjenninga av det nye modulbygget, og dette vart gjort med atterhald om at ein seinare vil gå gjennom heile skulen.
Bygget vert godkjent under føresetnad av at det vert reist i tråd med byggjeforskriftene og merknadene frå kommuneoverlegen. Fornying av godkjenninga for heile skulen føreset at alle skulebygga vert inspiserte seinare.
Framnes vart sist godkjent etter forskrift om miljøretta helsevern i 2008, men dei sakspapira finn ikkje rådmannen att. Idrettshallen Framnes Arena har ikkje vore ikkje godkjend før.
