Eldre ynskjer nye husvære
Bustadklubben i Norheimsund gjennomførte i fjor haust ei spørjeundersøking om trongen for tilrettelagde, rimelege bustader for seniorar.
Det kom inn 12 positive svar, skriv leiar Gunnar Eiken i klubben i ein e-post til ordføraren.
Klubben ynskjer difor eit møte med ordføraren og tidlegare sakshandsamarar frå teknisk eining og helseetaten for å høyra om heradet er interessert i at bustadklubben går vidare med tanken om å byggja ut eit område med tilrettelagde husvære for eldre i Norheimsund og Øystese. Desse må vera i ein rimelegare prisklasse enn det som har vorte tilbode i marknaden dei siste åra.
Styret i klubben har hatt eit møte med Klaus Rasmussen der han orienterte om tankane bak Kvam Bygdetun. Ein konstaterte at målgruppa er noko ulik, men at det kan vera mykje å henta på samarbeid.
Rasmussen fortalde at han hadde hatt eit møte med heradet og at det då vart peika på eit område i Tolomarka. Også for bustadklubben kan dette vera eit aktuelt område, då framtidas pensjonistar truleg er både friskare og meir mobile enn til no.
Bustadklubben i Norheimsund vart stifta kring 1990 og har som føremål å leggja til rette for at personar som har fylt 55 år, kan skaffa seg ein passande bustad tilrettelagd for eldre.
Klubben har i dag 70 medlemer. I styret sit leiar Gunnar Eiken, skrivar Hans Soldal, kasserar Anne Marit Åkvik og styremedlem Arvid Strømme.
