Denne vegen er friteken frå søknadsplikt
Det er nok ikkje fritt fram for den som vil byggja anleggsveg til eit kva som helst byggjetiltak, men det trengst ikkje løyve utover sjølve tiltaket.
Kvam herad har oppretta ein anleggsveg frå fylkesvegen i Tolomarka, forbi fotballbanen til den tidlegare barnehagen. HF fekk fleire spørsmål om kva tiltaket var for noko då det vart sett i gang i haust.
Ikkje søknadspliktig
Heradet har tidlegare fått rammeløyve til ombygging og tilbygg av Tolomarka bufellesskap og avlasting. Det opplyser leiar av forvalting, drift og vedlikehald i heradet, Stein Rykkje.
Prosjektleiinga forhøyrde seg med byggjesaksavdelinga om tilkome og rigging, og fekk vita at vegen ikkje var søknadspliktig sidan ein hadde eit rammeløyve og rett til å koma til tomta på ein god måte. Heradet sende likevel ut nabovarsel om vegbygginga.
Fleire grannar hadde merknader, og dei vart i stor grad teken til fylgje. Dei gjekk for det meste ut på at tilkoma burde leggjast vekk frå feltet. Slik er det no gjort, sjølv om dette medførte noko lenger og dyrare tilkomstveg.
– Men me ser òg at denne løysinga vert mykje meir skånsam for naboane, som no slepp anleggstrafikk nær bustadfeltet, skriv Rykkje.
– Må tilbakeføra terrenget
Heidi E. Ørjansen er plan- og byggjesakssjef i Kvam herad.
– Er det opp til utbyggjar kvar ein anleggsveg skal gå?
– Det viktigaste når du har eit mellombels tiltak er at du tilbakefører terrenget når du er ferdig med det. Det varierer kor lang veg ein har til ei byggjetomt. Nokre gonger er det ein enkel stikkveg som skal til, andre gonger treng du koma ut i terrenget. Det har me nokre døme på på Kvamskogen der det er krevjande å koma opp med maskiner for å byggja. Det same gjeld rivinga av dammen på Solhaug, der var det behov for å få ein lenger veg for å koma til.
– Kor lang kan ein anleggsveg basert på eit rammeløyve vera?
– Det er ikkje nokon regel gjeven i lov for kor lang ein anleggsveg kan vera. Det er berre sagt at der det er behov for å koma fram til ein byggjeplass, så skal ein få løyve til det. Og så må ein føra tilbake terrenget når ein er ferdig.
Ikkje naudsynt
I rammeløyvet frå 2018 står det ingen ting om veg fram til bygget. Men det er det ikkje alltid det treng gjera, seier Ørjansen.
– Har ein teke omsyn til merknadene som kom inn etter nabovarselet?
– Dei skal i alle fall vera handsama, kommenterte og vurderte. Om ein har teke omsyn til dei, varierer med kva for innspel det er snakk om. Det er sånn me gjer det i alle saker. Me les nabomerknaden, og så skal gjerne søkjar kommentera han, så skal me kommentera han i våre sakspapir og dra ein konklusjon ut ifrå merknaden.
Vert sikra
Ein anleggsveg er ikkje ein permanent veg. Vil ein ha ein permanent veg, må ein søkja om han som eit byggjetiltak.
Det er fysisk mogleg å køyra ein bil opp frå parkeringsplassen gjennom hovudporten. Om det trengst brannbil eller ambulanse, må desse køyra opp her.
– Eg reknar med at Rykkje har tenkt på å ikkje øydeleggja for bruken av fotballbanen, seier Ørjansen.
Anleggsvegen vert sikra med gjerde mellom gangveg frå byggjefeltet til fotballbanen. Gangvegen skal vera open bortsett frå i samband med sprengingsarbeid.
