Dei fleste er hyggelege, men enkelte vil ikkje ha desse to på besøk

Viss ikkje, kjem dei truleg til deg i løpet av dei neste månadene. Verksemda Jeessaa AS har fått i oppdrag å taksera alle eigedommane i Kvam i samband med ny utrekning av eigedomsskatt.

Arbeidet starta i slutten av mai og skal vera ferdig i oktober. Jeessaa byrjar i tettbygde strok og beveger seg så mot utkantane og dei meir utilgjengelege stadene.

Rundt 8.000 eigedomar skal takserast. Kring ti prosent var takserte i byrjinga av juni.

Mange møte

Taksator Øystein Thorsheim fortel at mange menneske lurar på kva dei gjer på.

– Me møter mange hyggelege folk, særleg viss det er fint vêr og dei sit ute i tunet. Kanskje éin prosent er ikkje like hyggeleg. Dei vil ikkje ha eigedomsskatt i det heile, seier han.

Taksatorane har spesielle retningsliner for å hindra koronasmitte. Taksten er basert på utvendig synfaring, og ein skal ikkje inn på eigedomen om det ikkje er spesielt behov for det.

Taksatorane er utstyrte med refleksvestar og identitetskort.

Nokre klagar

Utgangspunktet for skatten er ein fast rutemeterpris og plassering. Sentrale strok er meir attraktive, og dermed dyrare, enn utkantane. Deretter gjer taksatorane vurderingar av ytre og indre faktorar. Til dømes dreg fine omgjevnader og utsikt prisen opp, medan nærleik til hovudveg dreg han ned. Funkisvillaer er dyrare, medan gamle hus er billegare.

– Me prøver å finna rett omsetningsverdi, seier Eivind Aarland, dagleg leiar i Jeessaa.

Dei nye takstane skal kunngjerast 1. mars 2021, med seks vekers klagefrist.

Tre–fire prosent plar klaga på skattenivået, fortel Aarland.

– Det er mange variantar: Skattenivået er for høgt, arealet for stort, eller dei likar ikkje eigedomsskatt generelt, seier han.

Kvam herad betalar 1,5 millionar kroner for jobben. Jeessaa vann mot Bergen eiendomsrådgivning AS, Geomatikk IKT AS og Verditakst Ole C. Torgersen AS. Medan sistnemnde tilbydar var billegare, fekk Jeessaa betre uttelling for dokumentert kompetanse og erfaring.