Betalar millionar i eigedomsskatt – vil ha meir tilbake

– Eigedomsskatt skal gi kommunen høve til å gi betre tilbod til innbyggarane sine. Også hytteeigarar betalar eigedomsskatt, men våre medlemmer og eg meiner at Kvam herad ikkje har bidrege i tilstrekkeleg grad på Kvamskogen, seier styreleiar Eva Grimstad i Kvamskogen vel.

Ho viser til at hyttefolk i liten grad nyttar seg av dei kommunale tenestene. Få nyttar helsevesenet, ettersom vegen til Bergen – der dei fleste bur – er kort.

– Samstundes handlar me i butikkane og nyttar Hardangerbadet. Me er ein ressurs for kommunen. Me synest det me har fått tilbake, er knapt.

Tone Ødegård Skår på økonomikontoret i Kvam herad opplyser at eigarane på Kvamskogen betalar om lag 6,5 millionar kroner i eigedomsskatt. Heradet tek i år inn totalt 41,8 millionar kroner i eigedomsskatt på bustader og fritidsbustader.

Helst kunne Grimstad tenka seg at hytteeigarane slapp å betala skatten, eller i det minste betalte halv skatt. Men realistisk sett vonar ho i staden at heradet vert ein betre samarbeidspartnar for Kvamskogen vel, både økonomisk og fagleg.

Saka held fram under tabellen.

Betre samarbeid

Eigedomsskatt har vore eit heitt tema for Kvamskogen vel sida skatten vart innført for hytter og hus i Kvam. Grimstad seier at hyttefolka ikkje har sett noka positiv endring før i år.

– Hadde du spurt meg i fjor, ville eg ikkje vore så optimistisk. Men i år er eg veldig nøgd med samarbeidet, seier Grimstad.

Heradsstyret vedtok 16. juni samrøystes å løyva 300.000 kroner meir – totalt 450.000 kroner – til arbeidet med låglandsløyper på Kvamskogen. Prosjektet skal jobbast vidare med i eit samarbeid mellom heradet, Kvamskogen vel og Kvamskogen næringslag. Grimstad er glad for ekstraløyvinga.

– Dette samarbeider me godt om. Eg reknar med at det kjem av at me sjølve har laga gode planar og investerer. Me forventar at kommunen bidreg også i seinare år.

Låglandsløypa skal etter planen gå frå Eikedalen til Tokagjel. Ho skal tilgjengeleggjera Kvamskogen for barnefamiliar, unge og eldre og passa for syklar og barnevogner. Helst skal ho vera 2,5 meter brei, noko som også utløyser moglegheita for at heradet kan søka om spelepengar. Risikoen er at Fylkesmannen kan koma til å protestera på breidda, seier Grimstad.

Grimstad meiner dessutan at heradet bør bidra meir til løypekøyring. Det vert brukt om lag ein million kroner årleg, og heradet bidreg med 100.000 kroner. Løypene vert køyrde for sjeldan nokre stader, og nokre løyper ikkje i det heile, hevdar ho.

Ventar auke

Heradet er for tida i gang med ny taksering av alle eigedommane. Verksemda Jeessaa AS står for arbeidet.

Kvamskogen vel er ikkje nøgd. Grimstad meiner ein burde ha gjort ei såkalla kontorjustering i staden, slik Frp føreslo i fjor.

– Eg vil verta overraska om skatten ikkje aukar med ny taksering. Me synest det er ein uheldig måte å gjera det på, i og med at me i alle år har venta på betre samarbeid med oss på Kvamskogen, seier Grimstad.