1. desember er røykvarslardagen

Om svaret er nei, kan leiar av førebyggjande avdeling i Kvam brann- og redningsteneste, Mette E. Vintertun, hjelpa.

Levande lys, peiskos, matlaging og meir bruk av elektrisk utstyr utgjer ein ekstra risiko i juletida. Vintertun påpeikar difor at ein bør gjera det til ein hugseregel å testa røykvarslarane og byta batteri i dei på røykvarslardagen, tysdag 1. desember.

– Alle bustader og hytter skal ha røykvarslarar. Du må ha minst éin varslar i kvar etasje. Alarmen skal kunna høyrast tydeleg på opphaldsrom og soverom, også når døra mellom romma er stengd, seier Vintertun i ei pressemelding.

Ein kan testa røykvarslaren ved å halda test-knappen inne nokre sekund. Røykvarslaren skal då pipa. Om han ikkje gjer det, må ein byta batteri og utføra testen ein gong til, eventuelt kjøpa ny varslar. Om røykvarslaren gjev frå seg korte pip, vil det seia at batteriet byrjar å bli dårleg. Då må du byta batteriet med ein gong.

– Bruk gjerne røykvarslardagen til å hjelpa nokon som ikkje greier å testa eller byta batteri sjølv. Ein ny røykvarslar kan vera ei fin førjulsgåve, seier Vintertun.

Ho tilrår seriekopla røykvarslarar, slik at alle varslarane pip samstundes ved brann. Det kan gje deg verdfull tid til å evakuera deg sjølv og dine kjære, til dømes om ein brann startar i kjellaren og du søv i andre etasje.

– Det kan redda liv, seier Vintertun.

Røykvarslarar bør normalt bytast etter åtte til ti år. I rom med mykje støv og skit kan detektoren verta ustabil og gje falske alarmar, fordi sensoren vert skiten eller støvete. I slike miljø vil røykvarslaren ha kortare levetid.

Ein bør testa røykvarslarar jamleg og kvar gong du har vore bortreist over lenger tid, seier Vintertun.

– Røykvarslarar bør ein testa jamleg og kvar gong du har vore bortreist over lengre tid, seier Vintertun.

Røykvarslardagen er eit samarbeid mellom brann- og feiarvesenet, det lokale eltilsynet, Norsk brannvernforening, Gjensidige og Direktoratet for samfunnstryggleik og beredskap.