Vil skapa ny tradisjon i Ålvik

– Julemarknaden og julegrantenninga i Ålvik har som oftast vore to arrangement som kanskje ikkje eingong har gått på same dag. Det har me gjort noko med i år, seier Mette Hereid Aalvik.

Ho som vanlegvis arrangerer julemarknaden i Folkets Hus, hadde ikkje hadde høve i år. Difor bestemde Aalvik seg for å ta ansvaret saman med mannen sin, Anders Kvarmestøl Aalvik.

– Ålvik Skulemusikkorps og Ålvik Musikklag skulle spela til julegrantenninga på torget. Eg føreslo at dei like godt kunne koma opp til Folkets Hus, sidan folk allereie er samla her. Og så vart også julegrantenninga ein del av dei heile, fortel Aalvik.

Etter at borda til dei 14 seljarane på marknaden var rydda vekk, heldt musikklaga kvar sine minikonsertar, før juletreet vart drege ut på golvet. Anders Kvarmestøl Aalvik fekk æra av å setja støpselet i stikkontakten. Deretter kunne dei som hadde lyst, gå nokre rundar rundt treet. Programmet vart avslutta med at nissen kom.

Aalvik seier ho håpar kombinasjonen av fleire tradisjonar kan verta den nye tradisjonen i Ålvik. Ho prøvde også å få til eit fakkeltog frå Folkets Hus til kyrkja, der det var lysmesse same dag.

– Det gjekk ikkje denne gongen, men kanskje kan me inkludera kyrkja neste gong, seier ho.

Her kan du sjå bilete frå markeringane i både Ålvik, Øystese og Norheimsund. Dei som heldt seg utandørs, fekk ei fin og kald vinterramme kring det kommersielle opplegget.