– Ver deg sjølv!
Fredag føremiddag fekk 19 spente skodespelarspirer frå teatergruppa til Kvam kulturskule vist fram det dei har øvd på gjennom vinteren.
Borna framførte stykket «Liv, du lyver!» til skuleelevane ved Norheimsund skule. Dagen før hadde gruppa premiere. Men sjølv om stykket handlar om at ein skal vera seg sjølv, er det ikkje så lett å sleppa seg laus på ei scene.
– Korleis var det å stå på scena på premieren?
– Det var litt sånn nervar og sånn, men det gjekk bra, seier Signe.
Eirin byrja skjelva då ho såg at det kom folk inn i salen, og Aria klarte nesten ikkje å bevega seg skikkeleg i dei fyrste scenene. Øyvor fortel at om ho ser ansikta til folk ho kjenner, prøver ho å sjå vekk. Elles kan det verta vanskeleg å fokusera.
Det var fyrste gongen dramaelevane spela teater saman på denne måten. Det fortel dramapedagog Siv Mælen Strømmen.
– Dei er veldig modige!
Slåsting imponerte
Mathilde Bakke Skår, som spela hovudrolla, hadde ekstra mykje å tenkja på. Ikkje berre skulle ho hugsa alt som Liv, ho har også ei viktig rolle i ei framsyning med teatergruppa i Jondal same helga.
– Det er same stykket, på ein måte, men det er endra på. Det i Jondal er om Peer, og då spelar eg kjærasten hans, seier Mathilde.
Etter framsyninga fredag fekk elevane stilla spørsmål til skodespelarane. Ein av elevane lurte på korleis dei klarte å slåst så bra. Mathilde var ein av dei som slåst. Motstandaren var Lisa Grane Hisdal.
– Eg spør om ho faktisk kan ta i og dytta meg og slå meg, svara Lisa.
Ho har også øvd ein del på landingane, slik at det ikkje skal gjera så vondt.
Dramalæraren fortel at jentene har fått skikkeleg vondt på øving nokre gongar, men då seier dei berre «the show must go on».
Kva var eigentleg meininga? var neste spørsmål frå salen.
– At folk kan sjå ned på deg, men du skal ikkje bry deg, kom det frå ei.
– Ja. At du skal vera deg sjølv, lika det du likar, vera den du er og ha det fint med det, svara ei anna.
– Alle er alle si mor
Teaterstykket er – med idear frå Peer Gynt – skrive av dramatikar, skodespelar og regissør Vibeke Flesland Havre.
Allereie i august, då elevane byrja, vart dei presenterte for stykket. Sidan har elevane øvd og øvd.
– Det betyr ikkje det at det har vorte «nipugga» sidan då, men elevane har vorte meir og meir kjende med stykket og ulike teaterteknikkar gjennom skuleåret, seier dramapedagogen.
Borna er elevar frå 4. til 8. klasse. Trass aldersforskjellen tek dei godt vare på kvarandre.
— Det er veldig samlande. Me har jobba mykje med at no skal alle vera alle si mor bak scena, fortel ho.
Sjå fleire bilete frå framsyninga her:
