Triveleg trøtur i morgontimane
Sundag morgon gjekk Sykkelturen 2022 av stabelen. Etappen i Kvam gjekk frå Norheimsund til Ålvik.
Det er ikkje for alle å starta sundagen før klokka har fylt sju, men for deltakarane i Sykkelturen 2022 var det definitivt verd det.
Dagleg leiar i Grannehjelpa, Gunn Hilde Øymo, hadde eitt mål for arrangementet: å gje deltakarane ei oppleving for livet. Det fekk dei.
Sjå fleire bilete her:
Både sjåførar, syklistar og passasjerar lét vel om turen innover fjorden. Dagen starta med ein tur i robåt frå Hardanger fartøyvernsenter til sentrum i Norheimsund. Der heldt leiar for samfunn, næring og kultur i Kvam herad, Jon Nedkvitne, ein tale til dei frammøtte.
I Øystese venta ein tur med ribb som enda i Steinstø. Derfrå gjekk turen vidare til Ålvik. Seks syklar, fem veteranbilar og nokre fylgjebilar var med. Dei som ikkje fekk plass i syklane, fekk nemleg sitja på i veteranbilane. Kvam Veteranvogn Klubb stilte med fire personbilar og ein gamal brannbil.
Berit Nygård, som var ei av dei heldige som fekk sitja på med sykkel, tykte det var fantastisk å kunna nyta naturen i eit bedageleg tempo.
Høgtideleg
— Alt i alt har det gått veldig bra. Folk har vore nøgde og det har vore lett å arrangera, seier Øymo.
Om noko ikkje har gått heilt etter planen, har det ordna seg fort som berre det. Endåtil vêret var som håpa heile turen.
Det var ikkje mykje folk å sjå langs vegen så tidleg på dag, men Øymo har likevel inntrykk av at deltakarane fekk kjensla av at turen var høgtideleg. Og i Ålvik, der turen enda, var det godt oppmøte og mykje folk.
RC Ålvik hadde laga til bilbane. Der kunne ein få prøva radiostyrte bilar og fly. Nedom kafeen kunne ein laga tau på gamlemåten.
Ulike favorittar
Ålvik Røde Kors Hjelpekors hadde opna Kafé Kraftstasjonen. Rundt eit av borda i kafeen sat fire blide deltakarar. Både Jennifer Liebig, Siri Kjørlaug, Silje Borgen og John Skei var godt nøgde med turen.
For Liebig var turen med ribb dagens høgdepunkt. Ho har prøvd det ein gong før, i bylgjer, og då var det litt skummelt. Denne gongen, med flat sjø, var det berre kjekt.
Kjørlaug drog fram sjølve sykkelturen som det kjekkaste. Borgen tykte mest vel om den gamle brannbilen som tok fylgje med syklane innover.
